sab ki sunte hain hum apni baat bahut kam kahte hain

sab kī sunte haiñ ham apnī baat bahut kam kahte haiñ

ik tasvīr meñ har lamha ham kho.e kho.e rahte haiñ

rāz-e-mohabbat laakh chhupāyā faash magar ho kar hī rahā

ham to zabāñ se kuchh nahīñ kahte aañsū bahte rahte haiñ

jin kī ḳhātir duniyā bhar se ham ne naata toḌ liyā

vaqt paḌā to vo bhī ham ko begāna hī kahte haiñ

dukh denā āsān hai pyāre dukh sahnā āsān nahīñ

ye to hamārī hī himmat hai hañs hañs kar dukh sahte haiñ

is se baḌh kar aur qayāmat ai ġham-e-daurāñ kyā hogī

yaad bhī ab vo kam aate haiñ aañsū bhī kam bahte haiñ

sab ki sunte hain hum apni baat bahut kam kahte hain

ek taswir mein har lamha hum khoe khoe rahte hain

raaz-e-mohabbat lakh chhupaya fash magar ho kar hi raha

hum to zaban se kuchh nahin kahte aansu bahte rahte hain

jin ki KHatir duniya bhar se hum ne nata toD liya

waqt paDa to wo bhi hum ko begana hi kahte hain

dukh dena aasan hai pyare dukh sahna aasan nahin

ye to hamari hi himmat hai hans hans kar dukh sahte hain

is se baDh kar aur qayamat ai gham-e-dauran kya hogi

yaad bhi ab wo kam aate hain aansu bhi kam bahte hain