sab ma-siwa-e-ishq fareb-e-sarab hai

sab mā-sivā-e-ishq fareb-e-sarāb hai

maiñ bhī huuñ ḳhvāb merī javānī bhī ḳhvāb hai

hai bū-e-gul kahīñ kahīñ rang-e-sharāb hai

har chiiz meñ sharīk kisī kā shabāb hai

merī nazar savāl hai aur barmalā savāl

un kī nazar javāb hai aur lā-javāb hai

dil kār-zār-e-ishq-o-vafā meñ hai pesh pesh

tūfāñ ke sāmne hai agarche habāb hai

sham-e-jamāl dost kī uf re tajalliyāñ

kaunain ek dā.era-e-iltihāb hai

vo husn intiḳhāb-e-jahāñ hai agar to ho

merī bhī do jahāñ meñ nazar intiḳhāb hai

āzād-e-do-jahāñ huuñ salāmat ġhurūr-e-ishq

ab merī be-ḳhudī bhī ḳhudī kā javāb hai

irfān-e-dil nahīñ tujhe ai shikva-sanj dost

is aa.ine meñ rāz-e-shuhūd-o-hijāb hai

ik husn-e-be-niyāz jahāñ thā vahīñ rahā

varna har inqalāb ke ba.ad inqalāb hai

duniyā-e-ishq dair nahīñ hai haram nahīñ

ye sarzamīñ varā-e-jahān-e-ḳharāb hai

tūfāñ kī Thokaroñ meñ hamesha se huuñ 'zafar'

vo sham.a huuñ havāoñ meñ jo sho.ala-tāb hai

sab ma-siwa-e-ishq fareb-e-sarab hai

main bhi hun KHwab meri jawani bhi KHwab hai

hai bu-e-gul kahin kahin rang-e-sharab hai

har chiz mein sharik kisi ka shabab hai

meri nazar sawal hai aur barmala sawal

un ki nazar jawab hai aur la-jawab hai

dil kar-zar-e-ishq-o-wafa mein hai pesh pesh

tufan ke samne hai agarche habab hai

sham-e-jamal dost ki uf re tajalliyan

kaunain ek daera-e-iltihab hai

wo husn intiKHab-e-jahan hai agar to ho

meri bhi do jahan mein nazar intiKHab hai

aazad-e-do-jahan hun salamat ghurur-e-ishq

ab meri be-KHudi bhi KHudi ka jawab hai

irfan-e-dil nahin tujhe ai shikwa-sanj dost

is aaine mein raaz-e-shuhud-o-hijab hai

ek husn-e-be-niyaz jahan tha wahin raha

warna har inqalab ke baad inqalab hai

duniya-e-ishq dair nahin hai haram nahin

ye sarzamin wara-e-jahan-e-KHarab hai

tufan ki Thokaron mein hamesha se hun 'zafar'

wo shama hun hawaon mein jo shoala-tab hai