sab mutmain the subh ka aKHbar dekh kar

sab mutma.in the sub.h kā aḳhbār dekh kar

ḳhā.if the ham navishta-e-dīvār dekh kar

munsif gavāh had hai ki mazlūm bik ga.e

qīmat lagī jo zarf-e-ḳharīdār dekh kar

maiñ boriyā-nashīn ġharīb-ul-vatan faqīr

hairāñ thā shān-o-shaukat-e-darbār dekh kar

nā-vāqif-e-rusūm-e-huzūrī thā ki gayā

sab dam-ba-ḳhud the jur.at-e-iz.hār dekh kar

aisā nahīñ ki sab the haqā.eq se nā-balad

bas bolte the chashm-e-sharar-bār dekh kar

tark-e-tavahhumāt ne be-faiz kar diyā

bhaTke the ham bhī jubba-o-dastār dekh kar

koshish maiñ kartā rahtā huuñ ġhazloñ meñ apnī 'tāj'

bāteñ banā.ūñ chashm-o-ruḳh-e-yār dekh kar

sab mutmain the subh ka aKHbar dekh kar

KHaif the hum nawishta-e-diwar dekh kar

munsif gawah had hai ki mazlum bik gae

qimat lagi jo zarf-e-KHaridar dekh kar

main boriya-nashin gharib-ul-watan faqir

hairan tha shan-o-shaukat-e-darbar dekh kar

na-waqif-e-rusum-e-huzuri tha ki gaya

sab dam-ba-KHud the jurat-e-izhaar dekh kar

aisa nahin ki sab the haqaeq se na-balad

bas bolte the chashm-e-sharar-bar dekh kar

tark-e-tawahhumat ne be-faiz kar diya

bhaTke the hum bhi jubba-o-dastar dekh kar

koshish main karta rahta hun ghazlon mein apni 'taj'

baaten banaun chashm-o-ruKH-e-yar dekh kar