sab naqsh is falak ke nagine pe aa rahe

sab naqsh is falak ke nagīne pe aa rahe

kār-e-jahāñ tamām kamīne pe aa rahe

aage jo dilbarī thī so āshiq-kushī hai ab

jo kaam mehr ke the so kiine pe aa rahe

ġhusse meñ josh maarā jo dariyā-e-husn ne

jalve nazākatoñ ke pasīne pe aa rahe

Dartā hai dil ki is pe taraqqī na ho kahīñ

milne ke vaqt ab to mahīne pe aa rahe

tū kuchh na bole aur maza ho ki merā haath

kāñdhe se tere mastī meñ siine pe aa rahe

dariyā-e-dil kī mauj se ḳhatra hai chashm ko

mat ye kahīñ uchhal ke safīne pe aa rahe

puulī tale guzar ga.ī lākhoñ kī umr ab

gumbad meñ koī kaun se jiine pe aa rahe

jin kā dimāġh arsh pe thā ab haiñ pā.emāl

koThe pe jo ki rahte the ziine pe aa rahe

ganj-e-nihāñ se dil ke to vāqif hue na ham

kyā fā.eda jo zar ke dafīne pe aa rahe

do din ke chāo-chūz 'hasan' ke vo ho chuke

phir rafta rafta apne qarīne pe aa rahe

sab naqsh is falak ke nagine pe aa rahe

kar-e-jahan tamam kamine pe aa rahe

aage jo dilbari thi so aashiq-kushi hai ab

jo kaam mehr ke the so kine pe aa rahe

ghusse mein josh mara jo dariya-e-husn ne

jalwe nazakaton ke pasine pe aa rahe

Darta hai dil ki is pe taraqqi na ho kahin

milne ke waqt ab to mahine pe aa rahe

tu kuchh na bole aur maza ho ki mera hath

kandhe se tere masti mein sine pe aa rahe

dariya-e-dil ki mauj se KHatra hai chashm ko

mat ye kahin uchhal ke safine pe aa rahe

puli tale guzar gai lakhon ki umr ab

gumbad mein koi kaun se jine pe aa rahe

jin ka dimagh arsh pe tha ab hain paemal

koThe pe jo ki rahte the zine pe aa rahe

ganj-e-nihan se dil ke to waqif hue na hum

kya faeda jo zar ke dafine pe aa rahe

do din ke chao-chuz 'hasan' ke wo ho chuke

phir rafta rafta apne qarine pe aa rahe