sab ne honTon se laga kar toD Dala hai mujhe

sab ne hoñToñ se lagā kar toḌ Daalā hai mujhe

kūza-gar ne jaane kis miTTī se Dhālā hai mujhe

is tarah to aur manzar kī udāsī baḌh ga.ī

maiñ kahīñ ḳhud meñ nihāñ thā kyuuñ nikālā hai mujhe

shāḳh par rah kar kahāñ mumkin thā merā ye safar

ab havā ne apne hāthoñ meñ sambhālā hai mujhe

kyuuñ sajānā chāhte ho apnī palkoñ par mujhe

rā.egāñ sā ḳhvāb huuñ āñkhoñ ne Taalā hai mujhe

ik zarā sī dhuup ko le kar ye hañgāma huā

merī hī parchhā.iyoñ ne rauñd Daalā hai mujhe

jaane kitne chāñd taare raat ke jañgal meñ the

yaad lekin ek jugnū kā ujālā hai mujhe

ik dhaḌakte dil se maiñ ne ḳhud ko patthar kar liyā

ab butoñ ke saath hī bas rakhne vaalā hai mujhe

zindagī ne apnā koī ḳhvāb bunñe ke liye

ek ik dhāge kī sūrat khol Daalā hai mujhe

sab ne honTon se laga kar toD Dala hai mujhe

kuza-gar ne jaane kis miTTi se Dhaala hai mujhe

is tarah to aur manzar ki udasi baDh gai

main kahin KHud mein nihan tha kyun nikala hai mujhe

shaKH par rah kar kahan mumkin tha mera ye safar

ab hawa ne apne hathon mein sambhaala hai mujhe

kyun sajaana chahte ho apni palkon par mujhe

raegan sa KHwab hun aankhon ne Tala hai mujhe

ek zara si dhup ko le kar ye hangama hua

meri hi parchhaiyon ne raund Dala hai mujhe

jaane kitne chand tare raat ke jangal mein the

yaad lekin ek jugnu ka ujala hai mujhe

ek dhaDakte dil se main ne KHud ko patthar kar liya

ab buton ke sath hi bas rakhne wala hai mujhe

zindagi ne apna koi KHwab bunne ke liye

ek ek dhage ki surat khol Dala hai mujhe