sab sawalon ke jawab aapko mil jaenge

sab savāloñ ke javāb aap ko mil jā.eñge

aap pūchheñge magar pūchh ke pachhtā.eñge

dil-mohalle se nikāleñge tujhe dhuum ke saath

kirchiyāñ raah meñ is dil kī bhī phailā.eñge

āsmāñ dasht ko dekhegā to sharmā.egā

ḳhush-ḳhirām apne lahū se ise chamkā.eñge

hijr ko oḌh ke pā.eñge tirā 'ishq-e-davām

apnī āġhosh meñ bhar kar tujhe samjhā.eñge

kaj-adā.ī pe tirī laakh bhī sadqe hoñ raqīb

terī ḳhushbū ke ma'ānī na samajh pā.eñge

shaam hogī to har ik gul pe milegī shabnam

mere siine se tire zaḳhm ubhar ā.eñge

'ishq meñ ham ne ḳhudā ḳhud ko kiyā hai taslīm

log dīvāna kaheñge hameñ jhuTlāeñge

jām-dar-jām taḌapte hī raheñge mai-kash

vasl-dar-vasl isī pyaas ko bhaḌkā.eñge

‘ismat-e-hūr bhī hai ham se pareshāñ lekin

aap ko haath lagāte hue sharmā.eñge

chheḌ ke us ko ka.ī baar nazar se apnī

kuchh na boleñge faqat dekh ke muskā.eñge

us kī āġhosh meñ vahshat hai mire dil ko 'alī'

ḳhvāb tā'bīr se mil kar use jhuTlāeñge

sab sawalon ke jawab aap ko mil jaenge

aap puchhenge magar puchh ke pachhtaenge

dil-mohalle se nikalenge tujhe dhum ke sath

kirchiyan rah mein is dil ki bhi phailaenge

aasman dasht ko dekhega to sharmaega

KHush-KHiram apne lahu se ise chamkaenge

hijr ko oDh ke paenge tera 'ishq-e-dawam

apni aaghosh mein bhar kar tujhe samjhaenge

kaj-adai pe teri lakh bhi sadqe hon raqib

teri KHushbu ke ma'ani na samajh paenge

sham hogi to har ek gul pe milegi shabnam

mere sine se tere zaKHm ubhar aaenge

'ishq mein hum ne KHuda KHud ko kiya hai taslim

log diwana kahenge hamein jhuTlaenge

jam-dar-jam taDapte hi rahenge mai-kash

wasl-dar-wasl isi pyas ko bhaDkaenge

‘ismat-e-hur bhi hai hum se pareshan lekin

aap ko hath lagate hue sharmaenge

chheD ke us ko kai bar nazar se apni

kuchh na bolenge faqat dekh ke muskaenge

us ki aaghosh mein wahshat hai mere dil ko 'ali'

KHwab ta'bir se mil kar use jhuTlaenge