sab ukhaD gain meKHen jab lagain taswiren

sab ukhaḌ ga.iiñ meḳheñ jab lagā.īñ tasvīreñ

chīḳhtī haiñ dīvāreñ kyoñ sajā.īñ tasvīreñ

tez ho ga.iiñ yaaro aur dhaḌkaneñ dil kī

kapkapāte hoñToñ se jab lagā.īñ tasvīreñ

aa.ine kī kirchoñ ko dekh dekh rote haiñ

ik havā ke jhoñke ne kyā girā.īñ tasvīreñ

terī merī chāhat par kitnā tanz karte the

jal ga.e jahāñ vaale jab dikhā.īñ tasvīreñ

nā-gahāñ umañD aa.e merī aañkh meñ aañsū

aaj kuchh lifāfoñ se haath aa.iiñ tasvīreñ

jaise koī dhan vaalā apnā dhan chhupātā ho

ham ne saarī duniyā se yuuñ chhupā.īñ tasvīreñ

ai 'amīr' ham jin ko dekh dekh jiite the

nafratoñ ke sho.aloñ ne vo jalā.īñ tasvīreñ

sab ukhaD gain meKHen jab lagain taswiren

chiKHti hain diwaren kyon sajain taswiren

tez ho gain yaro aur dhaDkanen dil ki

kapkapate honTon se jab lagain taswiren

aaine ki kirchon ko dekh dekh rote hain

ek hawa ke jhonke ne kya girain taswiren

teri meri chahat par kitna tanz karte the

jal gae jahan wale jab dikhain taswiren

na-gahan umanD aae meri aankh mein aansu

aaj kuchh lifafon se hath aain taswiren

jaise koi dhan wala apna dhan chhupata ho

hum ne sari duniya se yun chhupain taswiren

ai 'amir' hum jin ko dekh dekh jite the

nafraton ke shoalon ne wo jalain taswiren