saba ki baat sunen phul se kalam karen

sabā kī baat suneñ phuul se kalām kareñ

bahār aa.e to ham bhī junūñ meñ naam kareñ

na koī ret kā Tiila na sāya-dār daraḳht

rah-e-vafā meñ musāfir kahāñ qayām kareñ

qadam qadam pe mile bolte hue patthar

tumhī batāo ki ab kis se ham kalām kareñ

mahak uḌātī huī aa.ī hai nasīm-e-bahār

kaho ab ahl-e-chaman se ki fikr-e-dām kareñ

hamārī raah meñ dīvār ban ga.ī duniyā

tumhāre shahr meñ kis kis ko ham salām kareñ

vo jin ke dam se zamāne ke ḳhvāb rangīñ haiñ

hamārī niiñd bhī aa kar kabhī harām kareñ

dhuāñ dhuāñ sī fazā shahr-e-dil kī hai 'parvāz'

na.e charāġh jalāne kā intizām kareñ

saba ki baat sunen phul se kalam karen

bahaar aae to hum bhi junun mein nam karen

na koi ret ka Tila na saya-dar daraKHt

rah-e-wafa mein musafir kahan qayam karen

qadam qadam pe mile bolte hue patthar

tumhi batao ki ab kis se hum kalam karen

mahak uDati hui aai hai nasim-e-bahaar

kaho ab ahl-e-chaman se ki fikr-e-dam karen

hamari rah mein diwar ban gai duniya

tumhaare shahr mein kis kis ko hum salam karen

wo jin ke dam se zamane ke KHwab rangin hain

hamari nind bhi aa kar kabhi haram karen

dhuan dhuan si faza shahr-e-dil ki hai 'parwaz'

nae charagh jalane ka intizam karen