sabhi andhere sameTe hue paDe rahna

sabhī añdhere sameTe hue paḌe rahnā

charāġh-e-rāh-guzar is tarah bane rahnā

ye ḳhvāhishoñ kā samundar sarāb jaisā hai

sabhī kā apne ta.āqub meñ bhāgte rahnā

na.ī bahār kī ḳhushiyāñ nasīb hoñ lekin

nishāniyāñ ga.e mausam kī bhī rakhe rahnā

udaas chehre koī bhī nahīñ paḌhā kartā

numā.ishoñ kī tarah aap bhī saje rahnā

maiñ itnī bhiiḌ meñ ik roz kho bhī saktā huuñ

kasī jagah to mirā naam bhī likhe rahnā

ai zindagī mire dukh-sukh kahāñ ye chhoḌ aa.ī

vo lamha lamha bikharnā vo rat-jage rahnā

'ra.īs' kaun sā aaseb hai makānoñ meñ

tamām shahr ye kahtā hai jāgte rahnā

sabhi andhere sameTe hue paDe rahna

charagh-e-rah-guzar is tarah bane rahna

ye KHwahishon ka samundar sarab jaisa hai

sabhi ka apne taaqub mein bhagte rahna

nai bahaar ki KHushiyan nasib hon lekin

nishaniyan gae mausam ki bhi rakhe rahna

udas chehre koi bhi nahin paDha karta

numaishon ki tarah aap bhi saje rahna

main itni bhiD mein ek roz kho bhi sakta hun

kasi jagah to mera nam bhi likhe rahna

ai zindagi mere dukh-sukh kahan ye chhoD aai

wo lamha lamha bikharna wo rat-jage rahna

'rais' kaun sa aaseb hai makanon mein

tamam shahr ye kahta hai jagte rahna