sabhi rishton ke darwaze muqaffal ho rahe hain

sabhī rishtoñ ke darvāze muqaffal ho rahe haiñ

hamāre biich jo raste the daldal ho rahe haiñ

abhī to dasht aa.e aur phir is ke baad jangal

abhī se kyoñ tumhāre paañv bojhal ho rahe haiñ

zamāne baad soyā huuñ mujhe sone do kuchh pal

adhūre ḳhvāb the jitne mukammal ho rahe haiñ

ye kaisī be-hisī kī dhuul ham par chhā rahī hai

ḳhud apnī zindagī se ham mo.attal ho rahe haiñ

thakan ab aap kī āñkhoñ meñ jamtī jā rahī hai

so ab ham aap kī nazroñ se ojhal ho rahe haiñ

'nabīl' utrā hai kaisā dil-rubā mausam zamīñ par

ki jitne niim the bastī meñ sandal ho rahe haiñ

sabhi rishton ke darwaze muqaffal ho rahe hain

hamare bich jo raste the daldal ho rahe hain

abhi to dasht aae aur phir is ke baad jangal

abhi se kyon tumhaare panw bojhal ho rahe hain

zamane baad soya hun mujhe sone do kuchh pal

adhure KHwab the jitne mukammal ho rahe hain

ye kaisi be-hisi ki dhul hum par chha rahi hai

KHud apni zindagi se hum moattal ho rahe hain

thakan ab aap ki aankhon mein jamti ja rahi hai

so ab hum aap ki nazron se ojhal ho rahe hain

'nabil' utra hai kaisa dil-ruba mausam zamin par

ki jitne nim the basti mein sandal ho rahe hain