sabz hai pairahan chand ka aaj phir

sabz hai pairahan chāñd kā aaj phir

rañg-e-rukHsār hai surḳh sā aaj phir

kar ga.ī kaam terī adā aaj phir

sehn-e-gul ne kahā marhabā aaj phir

tere paikar ko chhū kar chalī aa.ī hai

marmarīñ hai badan raat kā aaj phir

le ke āġhosh meñ chāñd ko āsmāñ

muñh zamīñ ko chiḌhātā rahā aaj phir

yaad chandan-vanoñ se guzartī rahī

man meñ sandal mahaktā rahā aaj phir

dil kī nākāmiyāñ hī ḳhatā-vār haiñ

vo gunāhoñ kā hai devtā aaj phir

chāñd sūraj hue āmne-sāmne

imtihāñ sāgaroñ kā rahā aaj phir

aao 'ālok' sair-e-chaman ko chaleñ

uTh ke aa.ī hai kaalī ghaTā aaj phir

sabz hai pairahan chand ka aaj phir

rang-e-rukHsar hai surKH sa aaj phir

kar gai kaam teri ada aaj phir

sehn-e-gul ne kaha marhaba aaj phir

tere paikar ko chhu kar chali aai hai

marmarin hai badan raat ka aaj phir

le ke aaghosh mein chand ko aasman

munh zamin ko chiDhata raha aaj phir

yaad chandan-wanon se guzarti rahi

man mein sandal mahakta raha aaj phir

dil ki nakaamiyan hi KHata-war hain

wo gunahon ka hai dewta aaj phir

chand suraj hue aamne-samne

imtihan sagaron ka raha aaj phir

aao 'alok' sair-e-chaman ko chalen

uTh ke aai hai kali ghaTa aaj phir