sach bata kahe ka paikan ye tere tir mein tha

sach batā kaahe kā paikāñ ye tire tiir meñ thā

jo maza aur hī zaḳhm-e-dil-e-dil-gīr meñ thā

aah is dil meñ ḳhudā jaane huā kyā varna

nāla-e-dil mirā Duubā huā tāsīr meñ thā

us kī tārīf karūñ maiñ ne kahāñ paa.ī zabāñ

ḳhūbī-o-lutf jo kuchh yaar kī taqrīr meñ thā

aah puurī abhī niklī hī na thī dil se ki yahāñ

dekhte kyā haiñ ki rauzan falak-e-pīr meñ thā

raat detā hī rahā dil ko mire pech pe pech

bal jo vo shoḳh tirī zulf-e-girah-gīr meñ thā

na diyā ġhusl isī vāste mujh ko pas-e-qatl

maiñ nahāyā huā āb-e-dam-e-shamshīr meñ thā

kyā balā shauq-e-shahādat thā ki thā hashr kā din

mujh ko vo arsa ki jo zab.h-o-takbīr meñ thā

the kal ash.ār sune ham ne sabhoñ ke lekin

sab se andāz anokhā ġhazal-e-'mīr' meñ thā

muzhda-e-vasl na pahuñchā thā tujhe 'aish' to phir

kyuuñ ifāqa tire kal rañg kī taġh.īr meñ thā

sach bata kahe ka paikan ye tere tir mein tha

jo maza aur hi zaKHm-e-dil-e-dil-gir mein tha

aah is dil mein KHuda jaane hua kya warna

nala-e-dil mera Duba hua tasir mein tha

us ki tarif karun main ne kahan pai zaban

KHubi-o-lutf jo kuchh yar ki taqrir mein tha

aah puri abhi nikli hi na thi dil se ki yahan

dekhte kya hain ki rauzan falak-e-pir mein tha

raat deta hi raha dil ko mere pech pe pech

bal jo wo shoKH teri zulf-e-girah-gir mein tha

na diya ghusl isi waste mujh ko pas-e-qatl

main nahaya hua aab-e-dam-e-shamshir mein tha

kya bala shauq-e-shahadat tha ki tha hashr ka din

mujh ko wo arsa ki jo zabh-o-takbir mein tha

the kal ashaar sune hum ne sabhon ke lekin

sab se andaz anokha ghazal-e-'mir' mein tha

muzhda-e-wasl na pahuncha tha tujhe 'aish' to phir

kyun ifaqa tere kal rang ki taghir mein tha