sach ke izhaar ka sheron ko bahana jaana

sach ke iz.hār kā she'roñ ko bahāna jaanā

bach rahe yuuñ ki zamāne ne fasāna jaanā

saḳht mā'tūb rahe aur ḳhatā itnī thī

jo ḳhudā na thā use ham ne ḳhudā na jaanā

is qadar bhī na jarī the ki ulajhte sab se

shor-e-shab-ḳhūñ ko magar bāñg-e-darā na jaanā

ab ke ilzām lagā ham pe khulī āñkhoñ kā

jo nazar aayā use us se sivā na jaanā

kam hī milte ho magar ye hai yaqīñ kā 'ālam

ham ne pal-bhar ko tumheñ ḳhud se judā na jaanā

maiñ vo nā-shukr ki har baar mulāqāt ke baa'd

maiñ ne har lamha-e-furqat ko zamāna jaanā

rahm khāte haiñ mire haal pe ahl-e-duniyā

maiñ ne īmān ko duniyā meñ ḳhazāna jaanā

sach ke izhaar ka she'ron ko bahana jaana

bach rahe yun ki zamane ne fasana jaana

saKHt ma'tub rahe aur KHata itni thi

jo KHuda na tha use hum ne KHuda na jaana

is qadar bhi na jari the ki ulajhte sab se

shor-e-shab-KHun ko magar bang-e-dara na jaana

ab ke ilzam laga hum pe khuli aankhon ka

jo nazar aaya use us se siwa na jaana

kam hi milte ho magar ye hai yaqin ka 'alam

hum ne pal-bhar ko tumhein KHud se juda na jaana

main wo na-shukr ki har bar mulaqat ke ba'd

main ne har lamha-e-furqat ko zamana jaana

rahm khate hain mere haal pe ahl-e-duniya

main ne iman ko duniya mein KHazana jaana