sad-rashk-e-anjuman hain ye tanhaiyan meri

sad-rashk-e-anjuman haiñ ye tanhā.iyāñ mirī

sūraj mirā sitāre mire kahkashāñ mirī

maanā ki qahqahe nahīñ mere nasīb meñ

sarmāya-e-nashāt hai āh-o-fuġhāñ mirī

har talḳh tajrabe ne kahā hañs ke mujh se yuuñ

ā.eñgī kaam tere yahī talḳhiyāñ mirī

rañg-e-bahār rang-e-ġhazal rañg-e-ḳhūn-e-dil

Duubī har ek rang meñ hai dāstāñ mirī

jhuktā nahīñ ye sar kisī sarkash ke sāmne

pā.inda bād-e-rif.at-e-fikr-e-javāñ mirī

tūfān-o-inqalāb ke afsāne ban ga.e

ulTā asar dikhā ga.iiñ ḳhāmoshiyāñ mirī

jab 'tāhira' milegā na ne'mul-badal mirā

yaad ā.eñgī zamāne ko tab ḳhūbiyāñ mirī

sad-rashk-e-anjuman hain ye tanhaiyan meri

suraj mera sitare mere kahkashan meri

mana ki qahqahe nahin mere nasib mein

sarmaya-e-nashat hai aah-o-fughan meri

har talKH tajrabe ne kaha hans ke mujh se yun

aaengi kaam tere yahi talKHiyan meri

rang-e-bahaar rang-e-ghazal rang-e-KHun-e-dil

Dubi har ek rang mein hai dastan meri

jhukta nahin ye sar kisi sarkash ke samne

painda baad-e-rifat-e-fikr-e-jawan meri

tufan-o-inqalab ke afsane ban gae

ulTa asar dikha gain KHamoshiyan meri

jab 'tahira' milega na ne'mul-badal mera

yaad aaengi zamane ko tab KHubiyan meri