sada apni rawish ahl-e-zamana yaad rakhte hain

sadā apnī ravish ahl-e-zamāna yaad rakhte haiñ

haqīqat bhuul jaate haiñ fasāna yaad rakhte haiñ

hujūm apnī jagah tārīk jañgal ke daraḳhtoñ kā

parinde phir bhī shāKٓH-e-āshiyāna yaad rakhte haiñ

hameñ andāza rahtā hai hamesha dost dushman kā

nishānī yaad rakhte haiñ nishāna yaad rakhte haiñ

ham insānoñ se to ye sañg-o-ḳhisht-e-bām-o-dar achchhe

musāfir kab huā ghar se ravāna yaad rakhte haiñ

duā-e-mausam-e-gul un ko raas aa hī nahīñ saktī

jo shāḳh-e-gul ke badle tāziyāna yaad rakhte haiñ

hamārī samt ik mauj-e-tarab aa.ī to yaad aayā

ki kuchh mausam hameñ bhī ġhā.ebāna yaad rakhte haiñ

ġhurūr un ko agar rahtā hai apnī kāmyābī kā

'sahar' ham bhī shikast-e-fātehāna yaad rakhte haiñ

sada apni rawish ahl-e-zamana yaad rakhte hain

haqiqat bhul jate hain fasana yaad rakhte hain

hujum apni jagah tarik jangal ke daraKHton ka

parinde phir bhi shaKٓH-e-ashiyana yaad rakhte hain

hamein andaza rahta hai hamesha dost dushman ka

nishani yaad rakhte hain nishana yaad rakhte hain

hum insanon se to ye sang-o-KHisht-e-baam-o-dar achchhe

musafir kab hua ghar se rawana yaad rakhte hain

dua-e-mausam-e-gul un ko ras aa hi nahin sakti

jo shaKH-e-gul ke badle taziyana yaad rakhte hain

hamari samt ek mauj-e-tarab aai to yaad aaya

ki kuchh mausam hamein bhi ghaebana yaad rakhte hain

ghurur un ko agar rahta hai apni kaamyabi ka

'sahar' hum bhi shikast-e-fatehana yaad rakhte hain