safar ba-KHair ho anjam tak pahunch jaen

safar ba-ḳhair ho anjām tak pahuñch jaa.eñ

ḳhudā kare ye qadam shaam tak pahuñch jaa.eñ

suḳhan kā saarā safar is liye kiyā maiñ ne

ki mere hoñT tire naam tak pahuñch jaa.eñ

na.e junūñ kī aziyyat bhī mohtaram hai mujhe

guzishta zaḳhm to ārām tak pahuñch jaa.eñ

makān-e-husn se bāhar bhī dekh aisā na ho

sharīf log dar-o-bām tak pahuñch jaa.eñ

ḳhabar nahīñ mirī āvāz phir sune koī

jinheñ pahuñchnā hai kohrām tak pahuñch jaa.eñ

hasīn raat kā mahtāb Duub jaane se qabl

sitāre gardish-e-ayyām tak pahuñch jaa.eñ

ḳhudā ke bande ḳhudā tak pahuñch ga.e haiñ 'alī'

jo raam vaale haiñ vo raam tak pahuñch jaa.eñ

safar ba-KHair ho anjam tak pahunch jaen

KHuda kare ye qadam sham tak pahunch jaen

suKHan ka sara safar is liye kiya main ne

ki mere honT tere nam tak pahunch jaen

nae junun ki aziyyat bhi mohtaram hai mujhe

guzishta zaKHm to aaram tak pahunch jaen

makan-e-husn se bahar bhi dekh aisa na ho

sharif log dar-o-baam tak pahunch jaen

KHabar nahin meri aawaz phir sune koi

jinhen pahunchna hai kohram tak pahunch jaen

hasin raat ka mahtab Dub jaane se qabl

sitare gardish-e-ayyam tak pahunch jaen

KHuda ke bande KHuda tak pahunch gae hain 'ali'

jo ram wale hain wo ram tak pahunch jaen