safar bhi koi na ho rahguzar bhi koi na ho

safar bhī koī na ho rahguzar bhī koī na ho

hamāre ba.ad ḳharāb is qadar bhī koī na ho

sab us hujūm meñ gum honā chāhte haiñ jahāñ

patā-Thikāna bhī ḳhair-o-ḳhabar bhī koī na ho

ḳhudā vo din na dikhā.e ki in dayāroñ meñ

sab āñkheñ rakhte huuñ aur dīda-var bhī koī na ho

zamāna kaash na aa.e ki phuul phal ke baġhair

faqat gharoñ kā ho jañgal shajar bhī koī na ho

zamīñ na bain kare mehrbān maañ kī tarah

karo kuchh aisā kisī kā zarar bhī koī na ho

phir us jahān meñ kaise raheñ kahāñ jaa.eñ

vatan bhī koī na ho aur ghar bhī koī na ho

hameñ zamīñ pe utārā gayā zavāl ke vaqt

yahī bajā hai to phir nauhagar bhī koī na ho

safar bhi koi na ho rahguzar bhi koi na ho

hamare baad KHarab is qadar bhi koi na ho

sab us hujum mein gum hona chahte hain jahan

pata-Thikana bhi KHair-o-KHabar bhi koi na ho

KHuda wo din na dikhae ki in dayaron mein

sab aankhen rakhte hun aur dida-war bhi koi na ho

zamana kash na aae ki phul phal ke baghair

faqat gharon ka ho jangal shajar bhi koi na ho

zamin na bain kare mehrban man ki tarah

karo kuchh aisa kisi ka zarar bhi koi na ho

phir us jahan mein kaise rahen kahan jaen

watan bhi koi na ho aur ghar bhi koi na ho

hamein zamin pe utara gaya zawal ke waqt

yahi baja hai to phir nauhagar bhi koi na ho