safar kaThin hi sahi kya ajab tha sath us ka

safar kaThin hī sahī kyā ajab thā saath us kā

añdherī raat meñ merā diyā thā haath us kā

kuchh aisī niiñd se jaagī ki phir na soī vo aañkh

jalā kiyā yūñhī kājal tamām raat us kā

tamām shab vo sitāroñ se guftugū us kī

tamām shab vo samundar sā iltifāt us kā

kabhī vo rabt ki āñkhoñ meñ jis tarah kājal

kabhī bichhaḌ ke vo milnā ġhazal-sifāt us kā

duā ke haath hī jaise diyā sambhālte haiñ

mohabbatoñ meñ vo uslūb-e-ehtiyāt us kā

maiñ apne ghar ke añdheroñ meñ lauT aayā 'shauq'

pukārtā hī rahā mujh ko shahr-e-zāt us kā

safar kaThin hi sahi kya ajab tha sath us ka

andheri raat mein mera diya tha hath us ka

kuchh aisi nind se jagi ki phir na soi wo aankh

jala kiya yunhi kajal tamam raat us ka

tamam shab wo sitaron se guftugu us ki

tamam shab wo samundar sa iltifat us ka

kabhi wo rabt ki aankhon mein jis tarah kajal

kabhi bichhaD ke wo milna ghazal-sifat us ka

dua ke hath hi jaise diya sambhaalte hain

mohabbaton mein wo uslub-e-ehtiyat us ka

main apne ghar ke andheron mein lauT aaya 'shauq'

pukarta hi raha mujh ko shahr-e-zat us ka