safar ke bab mein shamil hua ek na-safar main bhi

safar ke baab meñ shāmil huā ik nā-safar maiñ bhī

bahaktī āñdhiyāñ haiñ aur charāġh-e-rahguzar maiñ bhī

udhar bhī koī sozish koī sadma shor-āsā hai

sukūt-e-be-hamiyyat se pareshāñ huuñ idhar maiñ bhī

ajab hai marhala yaaro tilism-e-nā-rasā.ī kā

jo TūTegā ye sannāTā to jā.ūñgā bikhar maiñ bhī

sar-e-mizhgāñ lahū kī pesh-qadmī rang laa.ī hai

ki huuñ ab halqa-e-dīda-varāñ meñ ik ḳhabar maiñ bhī

zarā dekhūñ savāl-e-vasl par kyā rang ho un kā

tire hī saath chaltā huuñ Thahar ai nāma-bar maiñ bhī

tumhāre hī tanaffus se ye sub.heñ saañs letī haiñ

tumhāre lams se raushan haiñ ye shams-o-qamar maiñ bhī

yahāñ har har qadam ibrat-kade haiñ dīda-e-bīnā

haḌappa misr bābil nainvā ur kāshġhar maiñ bhī

safar ke bab mein shamil hua ek na-safar main bhi

bahakti aandhiyan hain aur charagh-e-rahguzar main bhi

udhar bhi koi sozish koi sadma shor-asa hai

sukut-e-be-hamiyyat se pareshan hun idhar main bhi

ajab hai marhala yaro tilism-e-na-rasai ka

jo TuTega ye sannaTa to jaunga bikhar main bhi

sar-e-mizhgan lahu ki pesh-qadmi rang lai hai

ki hun ab halqa-e-dida-waran mein ek KHabar main bhi

zara dekhun sawal-e-wasl par kya rang ho un ka

tere hi sath chalta hun Thahar ai nama-bar main bhi

tumhaare hi tanaffus se ye subhen sans leti hain

tumhaare lams se raushan hain ye shams-o-qamar main bhi

yahan har har qadam ibrat-kade hain dida-e-bina

haDappa misr babil nainwa ur kashghar main bhi