safar ki gard bhi us rah-guzar mein chhoD aaya

safar kī gard bhī us rah-guzar meñ chhoḌ aaya

maiñ apnā saarā asāsa safar meñ chhoḌ aaya

unhīñ ko log banā.eñge sang-e-mīl ik din

jo naqsh-e-pā maiñ tirī rah-guzar meñ chhoḌ aaya

ḳhabar na thī ki yahāñ duur tak daraḳht nahīñ

maiñ apnā sāya-e-ehsās ghar meñ chhoḌ aaya

vo kāmyāb safar hai jo dūsroñ ke liye

charāġh jaltā huā rah-guzar meñ chhoḌ aaya

ye dasht kyā mirī tesha-zanī ko samjhegā

maiñ apnā fan to dayār-e-hunar meñ chhoḌ aaya

maiñ likh rahā thā magar paḌh rahā thā aur koī

kisī kā lafz kisī kī nazar meñ chhoḌ aaya

yahī shu'ūr bahut hai ki ahl-e-fan ke liye

ik imtiyāz to 'aib-o-hunar meñ chhoḌ aaya

bichhaḌ ke mujh se judā.ī kā ranj kyoñ hai tujhe

maiñ apnā 'aks tirī chashm-e-tar meñ chhoḌ aaya

ḳhudā hī paar lagā.egā ab use 'razmī'

ye nāḳhudā to safīna bhañvar meñ chhoḌ aaya

safar ki gard bhi us rah-guzar mein chhoD aaya

main apna sara asasa safar mein chhoD aaya

unhin ko log banaenge sang-e-mil ek din

jo naqsh-e-pa main teri rah-guzar mein chhoD aaya

KHabar na thi ki yahan dur tak daraKHt nahin

main apna saya-e-ehsas ghar mein chhoD aaya

wo kaamyab safar hai jo dusron ke liye

charagh jalta hua rah-guzar mein chhoD aaya

ye dasht kya meri tesha-zani ko samjhega

main apna fan to dayar-e-hunar mein chhoD aaya

main likh raha tha magar paDh raha tha aur koi

kisi ka lafz kisi ki nazar mein chhoD aaya

yahi shu'ur bahut hai ki ahl-e-fan ke liye

ek imtiyaz to 'aib-o-hunar mein chhoD aaya

bichhaD ke mujh se judai ka ranj kyon hai tujhe

main apna 'aks teri chashm-e-tar mein chhoD aaya

KHuda hi par lagaega ab use 'razmi'

ye naKHuda to safina bhanwar mein chhoD aaya