safar ki ibtida hui ki tera dhyan aa gaya

safar kī ibtidā huī ki terā dhyān aa gayā

mirī zamīñ ke sāmne ik āsamān aa gayā

ye faisla huā mirī shanāḳht ā.īna kare

magar ye kis kā aks hai jo darmiyān aa gayā

ajiib uljhanoñ meñ ab ke sā.ateñ guzar ga.iiñ

nisāb yaad bhī nahīñ aur imtihān aa gayā

hisār-e-sail-e-āb se to naav bach ga.ī magar

havā ke haath sāhiloñ pe bādbān aa gayā

nigāh aur rāste ke dukh to raushnī se the

charāġh bujh ga.e to merā mehmān aa gayā

tirī sadā pe mujh ko lauTnā thā jañg chhoḌ kar

magar vo ek tiir jo sar-e-kamān aa gayā

maiñ bām-o-dar se pūchh aa.uuñ koī aayā to nahīñ

'salīm' raat Dhal ga.ī mirā makān aa gayā

safar ki ibtida hui ki tera dhyan aa gaya

meri zamin ke samne ek aasaman aa gaya

ye faisla hua meri shanaKHt aaina kare

magar ye kis ka aks hai jo darmiyan aa gaya

ajib uljhanon mein ab ke saaten guzar gain

nisab yaad bhi nahin aur imtihan aa gaya

hisar-e-sail-e-ab se to naw bach gai magar

hawa ke hath sahilon pe baadban aa gaya

nigah aur raste ke dukh to raushni se the

charagh bujh gae to mera mehman aa gaya

teri sada pe mujh ko lauTna tha jang chhoD kar

magar wo ek tir jo sar-e-kaman aa gaya

main baam-o-dar se puchh aaun koi aaya to nahin

'salim' raat Dhal gai mera makan aa gaya