safar mein hi chhupi unki KHushi hai

safar meñ hī chhupī un kī ḳhushī hai

musāfir ko masāfat bandagī hai

nazar sab aa rahā hai saaf kaalā

añdheroñ meñ bhī kitnī raushnī hai

pareshāñ huuñ maiñ din meñ raushnī se

to shab meñ chāñdnī pīchhe paḌī hai

udāsī hai to phīkā rang lekin

ye mujh tasvīr kā ik rang hī hai

ḳhatā is meñ nahīñ hai aa.ine kī

ye saarī gard chehroñ par jamī hai

badan merā hai ik vīrāñ makāñ, par

makīñ ban kar ye vahshat rah rahī hai

gale lag kar mire sahrā jo royā

jo baaqī tishnagī thī bujh ga.ī hai

zamīñ ke paañv bhārī haiñ falak se

ye ukhḌī an-manī rahne lagī hai

safar mein hi chhupi un ki KHushi hai

musafir ko masafat bandagi hai

nazar sab aa raha hai saf kala

andheron mein bhi kitni raushni hai

pareshan hun main din mein raushni se

to shab mein chandni pichhe paDi hai

udasi hai to phika rang lekin

ye mujh taswir ka ek rang hi hai

KHata is mein nahin hai aaine ki

ye sari gard chehron par jami hai

badan mera hai ek viran makan, par

makin ban kar ye wahshat rah rahi hai

gale lag kar mere sahra jo roya

jo baqi tishnagi thi bujh gai hai

zamin ke panw bhaari hain falak se

ye ukhDi an-mani rahne lagi hai