safar se aae to phir ek safar nasib hua

safar se aa.e to phir ik safar nasīb huā

ki 'umr-bhar ke liye kis ko ghar nasīb huā

vo ek chehra jo barsoñ rahā hai āñkhoñ meñ

kab us ko dekhnā bhī āñkh-bhar nasīb huā

tamām-'umr guzārī usī ke kāñdhe par

jo ek lamha hameñ muḳhtasar nasīb huā

havā meñ hilte hue haath aur nam āñkheñ

hameñ bas itnā hī zād-e-safar nasīb huā

huā ke ruḳh se pur-ummīd thā bahut gulshan

par ab ke bhī shajar-e-be-samar nasīb huā

bulandiyoñ kī havas meñ jo sab ko chhoḌ ga.e

kab un parindoñ ko apnā shajar nasīb huā

laboñ se niklīñ idhar aur udhar qubūl huiiñ

kahāñ du'āoñ meñ aisā asar nasīb huā

idhar chhupā.eñ to khil jaa.eñ dūsrī jānib

libās-e-zīst zarā muḳhtasar nasīb huā

'salīm' chāroñ-taraf tīrgī ke jaal ghane

pa ham ko neshtar-e-be-zarar nasīb huā

safar se aae to phir ek safar nasib hua

ki 'umr-bhar ke liye kis ko ghar nasib hua

wo ek chehra jo barson raha hai aankhon mein

kab us ko dekhna bhi aankh-bhar nasib hua

tamam-'umr guzari usi ke kandhe par

jo ek lamha hamein muKHtasar nasib hua

hawa mein hilte hue hath aur nam aankhen

hamein bas itna hi zad-e-safar nasib hua

hua ke ruKH se pur-ummid tha bahut gulshan

par ab ke bhi shajar-e-be-samar nasib hua

bulandiyon ki hawas mein jo sab ko chhoD gae

kab un parindon ko apna shajar nasib hua

labon se niklin idhar aur udhar qubul huin

kahan du'aon mein aisa asar nasib hua

idhar chhupaen to khil jaen dusri jaanib

libas-e-zist zara muKHtasar nasib hua

'salim' chaaron-taraf tirgi ke jal ghane

pa hum ko neshtar-e-be-zarar nasib hua