safar tawil hai bar-e-hayat kam kar lo

safar tavīl hai bār-e-hayāt kam kar lo

jo ho sake to mujhe bhī sharīk-e-ġham kar lo

kisī kā zikr to aa.e tumhāre naam ke saath

varaq hayāt kā saada hai kuchh raqam kar lo

agar ye shauq ki duniyā tumheñ salāmī de

to pahle apne liye ḳhud ko mohtaram kar lo

jo munhasir hai lahū par chaman kī zarḳhezī

to phir hamāre lahū se ye ḳhaak nam kar lo

doī kā karb baḌā jāñ-gudāz hotā hai

tum apnī zaat meñ mujh ko abhī se zam kar lo

diloñ meñ fāsle paidā hue haiñ nafrat se

ba-nām-e-mehr-o-vafā fāsloñ ko kam kar lo

muzāhimat se na pahuñchegā koī faiz tumheñ

kaTā lo gardaneñ yā phir saroñ ko ḳham kar lo

na hogī ham se parastish ubharte sūraj kī

ab iḳhtiyār hai tum ko ki sar qalam kar lo

subuk-ḳhirām haiñ kitne hī raah meñ 'tālib'

bichhaḌ na jaa.e koī sab ko ham-qadam kar lo

safar tawil hai bar-e-hayat kam kar lo

jo ho sake to mujhe bhi sharik-e-gham kar lo

kisi ka zikr to aae tumhaare nam ke sath

waraq hayat ka sada hai kuchh raqam kar lo

agar ye shauq ki duniya tumhein salami de

to pahle apne liye KHud ko mohtaram kar lo

jo munhasir hai lahu par chaman ki zarKHezi

to phir hamare lahu se ye KHak nam kar lo

doi ka karb baDa jaan-gudaz hota hai

tum apni zat mein mujh ko abhi se zam kar lo

dilon mein fasle paida hue hain nafrat se

ba-nam-e-mehr-o-wafa faslon ko kam kar lo

muzahimat se na pahunchega koi faiz tumhein

kaTa lo gardanen ya phir saron ko KHam kar lo

na hogi hum se parastish ubharte suraj ki

ab iKHtiyar hai tum ko ki sar qalam kar lo

subuk-KHiram hain kitne hi rah mein 'talib'

bichhaD na jae koi sab ko ham-qadam kar lo