safha-e-qirtas par KHush-rang tahriren nahin

saf.ha-e-qirtās par ḳhush-rang tahrīreñ nahīñ

apne qabze meñ abhī lafzoñ kī jāgīreñ nahīñ

zindagī ham ne guzārī ek beva kī tarah

ḳhvāb vo dekhe ki jin kī koī ta.abīreñ nahīñ

jī rahe haiñ shahr meñ sab log andeshoñ ke saath

ik tire hī paañv meñ sochoñ kī zanjīreñ nahīñ

aur uchhleñge adab ke masḳharoñ ke sar yahāñ

zang-ālūda abhī sheroñ kī shamshīreñ nahīñ

māñge tāñge par guzāra kar rahe haiñ dosto

zindagī karne kī apne paas tadbīreñ nahīñ

chīḳh kī sūrat hayāt-e-nau kā ik paiġhām haiñ

ham havā kī lauh par be-jān tasvīreñ nahīñ

sar jhukā kar zulm sahnā bhī sarāsar zulm hai

baḳhsh varna zulm kī kuchh aur tafsīreñ nahīñ

safha-e-qirtas par KHush-rang tahriren nahin

apne qabze mein abhi lafzon ki jagiren nahin

zindagi hum ne guzari ek bewa ki tarah

KHwab wo dekhe ki jin ki koi tabiren nahin

ji rahe hain shahr mein sab log andeshon ke sath

ek tere hi panw mein sochon ki zanjiren nahin

aur uchhlenge adab ke masKHaron ke sar yahan

zang-aluda abhi sheron ki shamshiren nahin

mange tange par guzara kar rahe hain dosto

zindagi karne ki apne pas tadbiren nahin

chiKH ki surat hayat-e-nau ka ek paigham hain

hum hawa ki lauh par be-jaan taswiren nahin

sar jhuka kar zulm sahna bhi sarasar zulm hai

baKHsh warna zulm ki kuchh aur tafsiren nahin