dasht mein qais nahin koh pe farhad nahin

dasht meñ qais nahīñ koh pe farhād nahīñ

hai vahī 'ishq kī duniyā magar ābād nahīñ

rasm-e-ulfat nahīñ aur shikva-e-bedād nahīñ

ye to kam-zarfī-e-jazbāt hai fariyād nahīñ

vo mirī ḳhāk-nashīnī ke maze kyā jaane

jo mirī tarah tirī raah meñ barbād nahīñ

DhūñDhne ko tujhe o mere na milne vaale

vo chalā hai jise apnā bhī pata yaad nahīñ

ek zanjīr-e-tarīqat meñ bañdhe haiñ donoñ

'ishq pāband sahī husn bhī āzād nahīñ

koh-o-tesha bhī hai ḳhusrau bhī hai shīrīñ bhī magar

hā-e-bad-baḳhtī-e-kohsār ki farhād nahīñ

sāz-e-shīrīñ se ye rah rah ke sadā aatī hai

kabhī kohsār bhī ābād thā ye yaad nahīñ

koī parchhā.īñ kahīñ se yūñhī Takrā.ī hai

jo bhī farhād hai parchhā.īñ hai farhād nahīñ

apnā mai-ḳhāna jo ujḌā hai to aisā ujḌā

pī ke kuchh nasha bhī hotā hai hameñ yaad nahīñ

ik tasavvur hai asīrī hai na āzādī hai

koī bhī qaid nahīñ koī bhī āzād nahīñ

'arsh vaale na suneñ saarī ḳhudā.ī sun le

is qadar past mazāq-e-lab-e-fariyād nahīñ

rūh-e-bulbul ne ḳhizāñ ban ke ujāḌā gulshan

phuul kahte rahe ham phuul haiñ sayyād nahīñ

husn se chuuk huī is kī hai tārīḳh gavāh

'ishq se bhuul huī hai ye mujhe yaad nahīñ

barbat-e-māh pe mizrāb-e-fuġhāñ rakh dī thī

maiñ ne ik naġhma sunāyā thā tumheñ yaad nahīñ

qafas-o-bulbul-o-gul sab haiñ ye fānūs-e-ḳhayāl

terī hastī se ziyāda koī sayyād nahīñ

laao ik sajda karūñ ālam-e-bad-mastī meñ

log kahte haiñ ki 'sāġhar' ko ḳhudā yaad nahīñ

dasht mein qais nahin koh pe farhad nahin

hai wahi 'ishq ki duniya magar aabaad nahin

rasm-e-ulfat nahin aur shikwa-e-bedad nahin

ye to kam-zarfi-e-jazbaat hai fariyaad nahin

wo meri KHak-nashini ke maze kya jaane

jo meri tarah teri rah mein barbaad nahin

DhunDhne ko tujhe o mere na milne wale

wo chala hai jise apna bhi pata yaad nahin

ek zanjir-e-tariqat mein bandhe hain donon

'ishq paband sahi husn bhi aazad nahin

koh-o-tesha bhi hai KHusrau bhi hai shirin bhi magar

ha-e-bad-baKHti-e-kohsar ki farhad nahin

saz-e-shirin se ye rah rah ke sada aati hai

kabhi kohsar bhi aabaad tha ye yaad nahin

koi parchhain kahin se yunhi Takrai hai

jo bhi farhad hai parchhain hai farhad nahin

apna mai-KHana jo ujDa hai to aisa ujDa

pi ke kuchh nasha bhi hota hai hamein yaad nahin

ek tasawwur hai asiri hai na aazadi hai

koi bhi qaid nahin koi bhi aazad nahin

'arsh wale na sunen sari KHudai sun le

is qadar past mazaq-e-lab-e-fariyaad nahin

ruh-e-bulbul ne KHizan ban ke ujaDa gulshan

phul kahte rahe hum phul hain sayyaad nahin

husn se chuk hui is ki hai tariKH gawah

'ishq se bhul hui hai ye mujhe yaad nahin

barbat-e-mah pe mizrab-e-fughan rakh di thi

main ne ek naghma sunaya tha tumhein yaad nahin

qafas-o-bulbul-o-gul sab hain ye fanus-e-KHayal

teri hasti se ziyaada koi sayyaad nahin

lao ek sajda karun aalam-e-bad-masti mein

log kahte hain ki 'saghar' ko KHuda yaad nahin