sahaara de nahin sakte shikasta panw ko

sahārā de nahīñ sakte shikasta paañv ko

haTāo rāh-e-mohabbat se rahnumāoñ ko

banā rahā huuñ hasīñ aur mah-laqāoñ ko

sajā rahā huuñ maiñ āfāq kī fazāoñ ko

nazar nazar se milātā huuñ muskurātā huuñ

junūñ kī shaan dikhātā huuñ dil-rubāoñ ko

qadam qadam pe na.e inqalāb raqsāñ haiñ

duā.eñ dete haiñ ham aap kī adāoñ ko

milā jo dāman-e-sāhil to aisī mauj aa.ī

safīne sauñp diye ham ne nā-ḳhudāoñ ko

nigāh pherne vāloñ se pūchhtā huuñ maiñ

tum āzmāoge kab tak mirī vafāoñ ko

abhī to dasht-o-daman meñ bahār aa.ī hai

abhī chaman meñ khilāne haiñ gul havāoñ ko

chale haiñ jānib-e-dār-o-rasan ḳharābātī

gunah kā rañg dikhānā hai pārsāoñ ko

har ek lamha-e-nau kā ab ehtirām karo

nayā payām do 'aḳhtar' na.ī fazāoñ ko

sahaara de nahin sakte shikasta panw ko

haTao rah-e-mohabbat se rahnumaon ko

bana raha hun hasin aur mah-laqaon ko

saja raha hun main aafaq ki fazaon ko

nazar nazar se milata hun muskuraata hun

junun ki shan dikhata hun dil-rubaon ko

qadam qadam pe nae inqalab raqsan hain

duaen dete hain hum aap ki adaon ko

mila jo daman-e-sahil to aisi mauj aai

safine saunp diye hum ne na-KHudaon ko

nigah pherne walon se puchhta hun main

tum aazmaoge kab tak meri wafaon ko

abhi to dasht-o-daman mein bahaar aai hai

abhi chaman mein khilane hain gul hawaon ko

chale hain jaanib-e-dar-o-rasan KHarabaati

gunah ka rang dikhana hai parsaon ko

har ek lamha-e-nau ka ab ehtiram karo

naya payam do 'aKHtar' nai fazaon ko