sahar anjaan si maghmum sa KHwab-e-wafa kyun hai

sahar anjān sī maġhmūm sā ḳhvāb-e-vafā kyuuñ hai

na jaane qurbatoñ ke naam se ye fāsla kyuuñ hai

añdhere zahr barsāne lage haiñ zindagānī par

kisī ke pyaar kā mahtāb aise meñ ḳhafā kyuuñ hai

zarā jab raat Dhaltī hai to ḳhvāboñ ke jharoke se

hasīñ mānūs shakloñ kā saverā jhāñktā kyuuñ hai

bahār aa.ī fazā mahkī ḳhushī ne haath phailā.e

to phir ye zindagī āvāra-e-dasht-e-vafā kyuuñ hai

shab-e-ġham kaT ga.ī lekin ujāloñ se gale mil kar

sahar kī aarzū itnī sahar nā-āshnā kyuuñ hai

mire anfās se aatī hai ḳhushbū-e-sahar kaisī

sukūt-e-bām-o-dar meñ aaj terī hī sadā kyuuñ hai

koī dil se nahīñ guzrā to 'sāqib' kaun batlā.e

kisī pāzeb kī jhankār se dil gūñjtā kyuuñ hai

sahar anjaan si maghmum sa KHwab-e-wafa kyun hai

na jaane qurbaton ke nam se ye fasla kyun hai

andhere zahr barsane lage hain zindagani par

kisi ke pyar ka mahtab aise mein KHafa kyun hai

zara jab raat Dhalti hai to KHwabon ke jharoke se

hasin manus shaklon ka sawera jhankta kyun hai

bahaar aai faza mahki KHushi ne hath phailae

to phir ye zindagi aawara-e-dasht-e-wafa kyun hai

shab-e-gham kaT gai lekin ujalon se gale mil kar

sahar ki aarzu itni sahar na-ashna kyun hai

mere anfas se aati hai KHushbu-e-sahar kaisi

sukut-e-baam-o-dar mein aaj teri hi sada kyun hai

koi dil se nahin guzra to 'saqib' kaun batlae

kisi pazeb ki jhankar se dil gunjta kyun hai