sahar ne aa kar mujhe sulaya to maine jaana

sahar ne aa kar mujhe sulāyā to maiñ ne jaanā

phir ek sapnā mujhe dikhāyā to maiñ ne jaanā

ba-juz havā ab rukegā koī na paas mere

añdherī shab meñ diyā bujhāyā to maiñ ne jaanā

gayā ye kah kar ki ek shab kī hai baat saarī

magar vo jab lauT kar na aayā to maiñ ne jaanā

maiñ ek tinkā rukā khaḌā thā nadī kināre

nadī ne bahnā mujhe sikhāyā to maiñ ne jaanā

siyāh bādal meñ barq kaundī to sab ne dekhā

tirī hañsī ne mujhe rulāyā to maiñ ne jaanā

maiñ oḌh kar ḳhud ko so gayā thā ki be-ḳhatar thā

koī parinda jo phaḌ-phaḌāyā to maiñ ne jaanā

mire hī siine meñ saḳht patthar sī shai hai koī

jo aaj tū ne mujhe batāyā to maiñ ne jaanā

maiñ terī nazroñ se gir chukā thā magar jo tū ne

mirī nazar se mujhe girāyā to maiñ ne jaanā

havā meñ shāmil thī tishnagī us ke tan-badan kī

havā ne merā badan jalāyā to maiñ ne jaanā

sahar ne aa kar mujhe sulaya to main ne jaana

phir ek sapna mujhe dikhaya to main ne jaana

ba-juz hawa ab rukega koi na pas mere

andheri shab mein diya bujhaya to main ne jaana

gaya ye kah kar ki ek shab ki hai baat sari

magar wo jab lauT kar na aaya to main ne jaana

main ek tinka ruka khaDa tha nadi kinare

nadi ne bahna mujhe sikhaya to main ne jaana

siyah baadal mein barq kaundi to sab ne dekha

teri hansi ne mujhe rulaya to main ne jaana

main oDh kar KHud ko so gaya tha ki be-KHatar tha

koi parinda jo phaD-phaDaya to main ne jaana

mere hi sine mein saKHt patthar si shai hai koi

jo aaj tu ne mujhe bataya to main ne jaana

main teri nazron se gir chuka tha magar jo tu ne

meri nazar se mujhe giraya to main ne jaana

hawa mein shamil thi tishnagi us ke tan-badan ki

hawa ne mera badan jalaya to main ne jaana