sahar-o-sham mein tanzim kahan hoti hai

sahar-o-shām meñ tanzīm kahāñ hotī hai

ḳhvāhish-e-sub.h kī tajsīm kahāñ hotī hai

luuT le jaatā hai bas chaltā hai jis kā jitnā

raushnī shahr meñ taqsīm kahāñ hotī hai

un mohalloñ meñ jahāñ ham ne guzārī hai hayāt

madrase hote haiñ ta.alīm kahāñ hotī hai

shahryāroñ ne ujāḌā ho jise hāthoñ se

phir se ābād vo aqlīm kahāñ hotī hai

tairte haiñ jo ġhulāmoñ kī jhukī āñkhoñ meñ

un savālāt kī tafhīm kahāñ hotī hai

jis kā e.azāz tire dar kī gadā.ī ho use

umr-bhar ḳhū-e-zar-o-sīm kahāñ hotī hai

ham ġharīboñ kī jabīñ par kisī jābir ke huzūr

tohmat-e-sajda-e-taslīm kahāñ hotī hai

sahar-o-sham mein tanzim kahan hoti hai

KHwahish-e-subh ki tajsim kahan hoti hai

luT le jata hai bas chalta hai jis ka jitna

raushni shahr mein taqsim kahan hoti hai

un mohallon mein jahan hum ne guzari hai hayat

madrase hote hain talim kahan hoti hai

shahryaron ne ujaDa ho jise hathon se

phir se aabaad wo aqlim kahan hoti hai

tairte hain jo ghulamon ki jhuki aankhon mein

un sawalat ki tafhim kahan hoti hai

jis ka eazaz tere dar ki gadai ho use

umr-bhar KHu-e-zar-o-sim kahan hoti hai

hum gharibon ki jabin par kisi jabir ke huzur

tohmat-e-sajda-e-taslim kahan hoti hai