sahn-e-gul-rang se aankhon ki rifaqat hai abhi

sahn-e-gul-rang se āñkhoñ kī rifāqat hai abhī

niiñd TuuTī hai magar ḳhvāb salāmat hai abhī

be-sabab to nahīñ chehre pe thakan ke āsār

dosh-e-ehsās pe ik bār-e-amānat hai abhī

dard-o-ġham naġhma-sarā haiñ mirī shiryānoñ meñ

ek ik saañs mirī mahv-e-ibādat hai abhī

rang kyā raushnī tasvīr huī jaatī hai

lamha-e-hijr-e-musalsal kī ināyat hai abhī

kaun sā mūnis-o-ġham-ḳhvār kahāñ kā ham-zād

ḳhud mirī zaat pas-e-gard-e-masāfat hai abhī

be-ḳhudī kyoñ na kare raqs mire paikar meñ

zaḳhm raushan haiñ mire dard meñ lazzat hai abhī

jaane kis moḌ pe dāmān-e-havas phailā de

'rāz' ye qalb jo maa.il ba-qanā.at hai abhī

sahn-e-gul-rang se aankhon ki rifaqat hai abhi

nind TuTi hai magar KHwab salamat hai abhi

be-sabab to nahin chehre pe thakan ke aasar

dosh-e-ehsas pe ek bar-e-amanat hai abhi

dard-o-gham naghma-sara hain meri shiryanon mein

ek ek sans meri mahw-e-ibaadat hai abhi

rang kya raushni taswir hui jati hai

lamha-e-hijr-e-musalsal ki inayat hai abhi

kaun sa munis-o-gham-KHwar kahan ka ham-zad

KHud meri zat pas-e-gard-e-masafat hai abhi

be-KHudi kyon na kare raqs mere paikar mein

zaKHm raushan hain mere dard mein lazzat hai abhi

jaane kis moD pe daman-e-hawas phaila de

'raaz' ye qalb jo mail ba-qanaat hai abhi