sahra ki tarah shahr-e-wafa hai ki nahin hai

sahrā kī tarah shahr-e-vafā hai ki nahīñ hai

har sāhib-e-dil ābla-pā hai ki nahīñ hai

pahchānte haiñ log tire naam se mujh ko

ab terā patā merā patā hai ki nahīñ hai

taskīn ke lamhāt ko tarsī huī duniyā

hālāt se har chand ḳhafā hai ki nahīñ hai

nāmūs-e-vatan lūTne vāloñ ke liye bhī

yā-rab koī ā.īn-e-sazā hai ki nahīñ hai

is zulf ke saa.e meñ ye ehsās jalā.e

hañste hue sahrā pe ghaTā hai ki nahīñ hai

jis husn kā partav mirī taqdīr badal de

vo mere liye zill-e-humā hai ki nahīñ hai

'nusrat' maiñ isī fikr meñ rahtā huuñ pareshāñ

insān ko haqīqat meñ fanā hai ki nahīñ hai

sahra ki tarah shahr-e-wafa hai ki nahin hai

har sahib-e-dil aabla-pa hai ki nahin hai

pahchante hain log tere nam se mujh ko

ab tera pata mera pata hai ki nahin hai

taskin ke lamhat ko tarsi hui duniya

haalat se har chand KHafa hai ki nahin hai

namus-e-watan luTne walon ke liye bhi

ya-rab koi aain-e-saza hai ki nahin hai

is zulf ke sae mein ye ehsas jalae

hanste hue sahra pe ghaTa hai ki nahin hai

jis husn ka partaw meri taqdir badal de

wo mere liye zill-e-huma hai ki nahin hai

'nusrat' main isi fikr mein rahta hun pareshan

insan ko haqiqat mein fana hai ki nahin hai