sahra-sahra kahne se gulzar badalte nain

sahrā-sahrā kahne se gulzār badalte na.iiñ

dekh ke tevar dushman ke ham yaar badalte na.iiñ

baat to ye hai bande ke kirdār se ḳhushbū aa.e

gucci boss lagāne se kirdār badalte na.iiñ

ghar kī zīnat ghar vāloñ kī izzat pyaar se hai

land-cruiser porsche se ghar-bār badalte na.iiñ

jin kī fitrat meñ ho Dasnā Das ke rahte haiñ

B-A m-a karne se afkār badalte na.iiñ

baat to tab hai ka.aba-e-dil kā karne lage tavāf

rasmī umre kar ke duniyā-dār badalte na.iiñ

aisā hai ki aisā vaisā aur nahīñ hai kuchh bhī

aisā hai ki kuchh bhī ho ham pyaar badalte na.iiñ

dānish-mandī hai vo karnā jo bhī kahe tabīb

nusḳhe jeb meñ rakhne se bīmār badalte na.iiñ

jo haiñ apne vo har haal meñ apne rahte haiñ

ham mausam ko dekh ke rishte-dār badalte na.iiñ

aksar tanhā rah jaate haiñ tez-mizāj vo log

dekh ke chaal jo apnoñ kī raftār badalte na.iiñ

bārish kī sūrat jo utreñ vo hī likhe jaa.eñ

is ke ba.ad 'mubārak' ke ash.ār badalte na.iiñ

sahra-sahra kahne se gulzar badalte nain

dekh ke tewar dushman ke hum yar badalte nain

baat to ye hai bande ke kirdar se KHushbu aae

gucci boss lagane se kirdar badalte nain

ghar ki zinat ghar walon ki izzat pyar se hai

land-cruiser porsche se ghar-bar badalte nain

jin ki fitrat mein ho Dasna Das ke rahte hain

B-A m-a karne se afkar badalte nain

baat to tab hai kaba-e-dil ka karne lage tawaf

rasmi umre kar ke duniya-dar badalte nain

aisa hai ki aisa waisa aur nahin hai kuchh bhi

aisa hai ki kuchh bhi ho hum pyar badalte nain

danish-mandi hai wo karna jo bhi kahe tabib

nusKHe jeb mein rakhne se bimar badalte nain

jo hain apne wo har haal mein apne rahte hain

hum mausam ko dekh ke rishte-dar badalte nain

aksar tanha rah jate hain tez-mizaj wo log

dekh ke chaal jo apnon ki raftar badalte nain

barish ki surat jo utren wo hi likhe jaen

is ke baad 'mubarak' ke ashaar badalte nain