sahun na hijr ke sadme kabhi visal ke baad

sahūñ na hijr ke sadme kabhī visāl ke baad

koī ḳhayāl nahīñ dil meñ is ḳhayāl ke baad

ġham-e-firāq nahīñ muzhda-e-visāl ke baad

shugūn-e-bad kā asar kyā ho nek-fāl ke ba.ad

kisī tarah to dahan kā subūt mil jaatā

javāb ek bhī dete vo sau savāl ke baad

fareb dene ko sayyād uḌā na be-par kī

bahār aa.egī gulshan meñ ek saal ke ba.ad

na phūlo mun.imo zartār hai agar malbūs

galīm oḌhte dekhā hai maiñ ne shaal ke ba.ad

kisī ko ab nahīñ mādūm ke vajūd meñ shak

khulā hai rāz-e-dahan laakh qīl-o-qāl ke ba.ad

ġhalat ye hai ki pas-e-ranj hotī hai rāhat

ḳhushī kā muñh nahīñ dekhā kabhī malāl ke baad

huzūr-e-dāvar-e-mahshar Thahar chuke qātil

ye bahs kaisī nikālī ab infi.āl ke ba.ad

yahāñ to aaj hī jiine ke paḌ ga.e laale

shabāb aa.egā zālim kā chand saal ke ba.ad

vo shoḳh ahd-shikan bhī hai ai dil-e-nādāñ

ġham-e-firāq bhī hai muzhda-e-visāl ke ba.ad

huā hai be-hama vo shoḳh bāhama ho kar

firāq ho gayā madd-e-nazar visāl ke baad

tumhārī zulf kā saudā thā kyā junūñ-afzā

mizāj raah par aaya na iḳhtilāl ke baad

jo qurb-tar thā rag-e-jāñ se vo hai arsh-nashīñ

huiiñ haiñ dūriyāñ paidā ye ittisāl ke baad

ḳhayāl mizhgāñ kā nashtar-shikan rahe dil meñ

ki zaḳhm meñ na rahe chuur indimāl ke baad

ḳhabar nahīñ tujhe ai chashm-e-shauq-e-dīd-talab

baḌheñgī ārzūeñ aur dekh-bhāl ke baad

yahī haiñ lail-o-nahār ai falak ġharīboñ ke

milā bhī vo mah-e-kāmil to māh-o-sāl ke ba.ad

ye aa ke bai.at-e-dast-e-subū agar kar le

banā.ūñ pīr-e-muġhāñ shaiḳh ko kalāl ke baad

jo yād-e-nargis-e-jādū ho dasht-e-ġhurbat meñ

uḌā.ūñ ḳhaak maiñ gard-e-ram-e-ġhazāl ke baad

chaḌhā.īñ tyoriyāñ kyā kyā na jā-e-chādar-e-gul

jo aa.e bhī sar-e-turbat vo intiqāl ke baad

numū-e-ḳhat huā ḳhurshīd-e-husn Dhalne lagā

zavāl kā huā āġhāz lo kamāl ke baad

maiñ dil ko detā huuñ taskīñ ye hijr meñ kah kar

mileñgī rāhateñ ranj-o-ġham-o-malāl ke ba.ad

asīr-e-dām kiyā mujh ko hirs-e-dāna ne

farefta huā gesū kā ishq-e-ḳhāl ke ba.ad

ġharīb-ḳhāna to daulat-sarā ke hai nazdīk

kabhī guzar ho idhar bhī to māh-o-sāl ke ba.ad

na bhūlnā shab-e-furqat kī talḳh-kāmī ko

maza kuchh aur bhī hai lazzat-e-visāl ke baad

ye aabrū kī hai qīmat atā na kah is ko

diyā gadā ko agar tū ne kuchh savāl ke baad

ḳhamīda shakl-e-mah-e-nau huā huuñ piirī meñ

zavāl 'badr' ko hone lagā kamāl ke baad

qamar kī tarah na hoñ kāhisheñ kabhī us ko

zavāl 'badr' ko yā-rab na ho kamāl ke ba.ad

sahun na hijr ke sadme kabhi visal ke baad

koi KHayal nahin dil mein is KHayal ke baad

gham-e-firaq nahin muzhda-e-visal ke baad

shugun-e-bad ka asar kya ho nek-fal ke baad

kisi tarah to dahan ka subut mil jata

jawab ek bhi dete wo sau sawal ke baad

fareb dene ko sayyaad uDa na be-par ki

bahaar aaegi gulshan mein ek sal ke baad

na phulo munimo zartar hai agar malbus

galim oDhte dekha hai main ne shaal ke baad

kisi ko ab nahin madum ke wajud mein shak

khula hai raaz-e-dahan lakh qil-o-qal ke baad

ghalat ye hai ki pas-e-ranj hoti hai rahat

KHushi ka munh nahin dekha kabhi malal ke baad

huzur-e-dawar-e-mahshar Thahar chuke qatil

ye bahs kaisi nikali ab infial ke baad

yahan to aaj hi jine ke paD gae lale

shabab aaega zalim ka chand sal ke baad

wo shoKH ahd-shikan bhi hai ai dil-e-nadan

gham-e-firaq bhi hai muzhda-e-visal ke baad

hua hai be-hama wo shoKH bahama ho kar

firaq ho gaya madd-e-nazar visal ke baad

tumhaari zulf ka sauda tha kya junun-afza

mizaj rah par aaya na iKHtilal ke baad

jo qurb-tar tha rag-e-jaan se wo hai arsh-nashin

huin hain duriyan paida ye ittisal ke baad

KHayal mizhgan ka nashtar-shikan rahe dil mein

ki zaKHm mein na rahe chur indimal ke baad

KHabar nahin tujhe ai chashm-e-shauq-e-did-talab

baDhengi aarzuen aur dekh-bhaal ke baad

yahi hain lail-o-nahaar ai falak gharibon ke

mila bhi wo mah-e-kaamil to mah-o-sal ke baad

ye aa ke baiat-e-dast-e-subu agar kar le

banaun pir-e-mughan shaiKH ko kalal ke baad

jo yaad-e-nargis-e-jadu ho dasht-e-ghurbat mein

uDaun KHak main gard-e-ram-e-ghazal ke baad

chaDhain tyoriyan kya kya na ja-e-chadar-e-gul

jo aae bhi sar-e-turbat wo intiqal ke baad

numu-e-KHat hua KHurshid-e-husn Dhalne laga

zawal ka hua aaghaz lo kamal ke baad

main dil ko deta hun taskin ye hijr mein kah kar

milengi rahaten ranj-o-gham-o-malal ke baad

asir-e-dam kiya mujh ko hirs-e-dana ne

farefta hua gesu ka ishq-e-KHal ke baad

gharib-KHana to daulat-sara ke hai nazdik

kabhi guzar ho idhar bhi to mah-o-sal ke baad

na bhulna shab-e-furqat ki talKH-kaami ko

maza kuchh aur bhi hai lazzat-e-visal ke baad

ye aabru ki hai qimat ata na kah is ko

diya gada ko agar tu ne kuchh sawal ke baad

KHamida shakl-e-mah-e-nau hua hun piri mein

zawal 'badr' ko hone laga kamal ke baad

qamar ki tarah na hon kahishen kabhi us ko

zawal 'badr' ko ya-rab na ho kamal ke baad