sail-e-KHun paikar-e-ashaar mein Dhalta hi nahin

sail-e-ḳhūñ paikar-e-ash.ār meñ Dhaltā hī nahīñ

ġham vo laavā hai jo siine se ubaltā hī nahīñ

aa.ine laakh magar ek sī tasvīreñ haiñ

kis ko dekhūñ maiñ koī shakl badaltā hī nahīñ

jo bhaTaktā thā kabhī dhuup ke sahrāoñ meñ

ab vo saaya mirī chaukhaT se nikaltā hī nahīñ

koī tahrīr miTā.eñ to dhuāñ uThtā hai

dil vo bhīgā huā kāġhaz hai ki jaltā hī nahīñ

mujh se muñh pherne vaale mirī qīmat pahchān

maiñ vo sikka huuñ jo bāzār meñ chaltā hī nahīñ

kaun chhīnegā mirī soch kī daulat 'rāshid'

jism kā bojh to logoñ se sañbhaltā hī nahīñ

sail-e-KHun paikar-e-ashaar mein Dhalta hi nahin

gham wo lawa hai jo sine se ubalta hi nahin

aaine lakh magar ek si taswiren hain

kis ko dekhun main koi shakl badalta hi nahin

jo bhaTakta tha kabhi dhup ke sahraon mein

ab wo saya meri chaukhaT se nikalta hi nahin

koi tahrir miTaen to dhuan uThta hai

dil wo bhiga hua kaghaz hai ki jalta hi nahin

mujh se munh pherne wale meri qimat pahchan

main wo sikka hun jo bazar mein chalta hi nahin

kaun chhinega meri soch ki daulat 'rashid'

jism ka bojh to logon se sanbhalta hi nahin