sainkaDon phul lagae magar aisa na hua

saiñkaḌoñ phuul lagā.e magar aisā na huā

merā āñgan tire ruḳhsār se gahrā na huā

us ne jo zaḳhm lagā.e the vo shādāb rahe

us ne jo rang lagāyā thā vo halkā na huā

dastaḳhat aur ke haiñ lams kisī aur kā hai

yā'nī ye naam bhī is peḌ pe pahlā na huā

kaash maiñ apne muqaddar meñ use likh paatā

kaash vaisā kabhī hotā abhī jaisā na huā

dil ko ab kār-e-mohabbat pe hañsī aatī hai

go ye dāman tire bohtān se mailā na huā

ashk le jā.ūñgā jalte hue ḳhemoñ kī taraf

gar mire haath koī dūsrā dariyā na huā

qābil-e-dār thā maiñ qābil-e-dastār nahīñ

mujh ko afsos hai ajdād kā achchhā na huā

sainkaDon phul lagae magar aisa na hua

mera aangan tere ruKHsar se gahra na hua

us ne jo zaKHm lagae the wo shadab rahe

us ne jo rang lagaya tha wo halka na hua

dastaKHat aur ke hain lams kisi aur ka hai

ya'ni ye nam bhi is peD pe pahla na hua

kash main apne muqaddar mein use likh pata

kash waisa kabhi hota abhi jaisa na hua

dil ko ab kar-e-mohabbat pe hansi aati hai

go ye daman tere bohtan se maila na hua

ashk le jaunga jalte hue KHemon ki taraf

gar mere hath koi dusra dariya na hua

qabil-e-dar tha main qabil-e-dastar nahin

mujh ko afsos hai ajdad ka achchha na hua