sair karte use dekha hai jo bazaron mein

sair karte use dekhā hai jo bāzāroñ meñ

mashvare hote haiñ yūsuf ke ḳharīdāroñ meñ

chāhte haiñ ki koī ġhairat-e-yūsuf phañs jaa.e

kis qadar khoTe khare bante haiñ bāzāroñ meñ

do-qadam chal ke jo tū chaal dikhā de apnī

Thokareñ khāte phireñ kabk bhī kohsāroñ meñ

ḳhūn-e-ushshāq se lāzim hai ye parhez kareñ

ki shumār aap kī āñkhoñ kā hai bīmāroñ meñ

shaiḳh-e-ka.aba ho diyā barhaman-e-but-ḳhāna

ek hī ke dar ye donoñ haiñ parastāroñ meñ

dekhiye kitne ḳharīdār haiñ kyā uThnā hai

jins dil bhej ke un ko koī hai bāzāroñ meñ

fasl-e-gul aa.ī ḳhizāñ bhī hue gulzār magar

tā.ir-e-dil hai hunūz un ke giraftāroñ meñ

sair ke vāste niklā jo vo rashk-e-yūsuf

band raste hue ThaT lag ga.e bāzāroñ meñ

ye nayā yaar kī sarkār meñ dekhā insāf

be-gunah bhī gine jaate haiñ gunahgāroñ meñ

kahīñ DhūñDe se bhī milte the na arbāb-e-kamāl

jin dinoñ qadr-shanāsī thī ḳharīdāroñ meñ

teġh-e-qātil ke gale milte haiñ ḳhush ho ho kar

īd-e-qurbāñ hai mohabbat ke gunah-gāroñ meñ

kisī amn se na uljhā na hui sohbat-e-gul

ai za.īfī tan-e-zār apnā hai un ḳhāroñ meñ

'qalaq' isbāt-e-dahan muñh ko na khulvā.e kahīñ

hai baḌī baat agar baat rahī yāroñ meñ

sair karte use dekha hai jo bazaron mein

mashware hote hain yusuf ke KHaridaron mein

chahte hain ki koi ghairat-e-yusuf phans jae

kis qadar khoTe khare bante hain bazaron mein

do-qadam chal ke jo tu chaal dikha de apni

Thokaren khate phiren kabk bhi kohsaron mein

KHun-e-ushshaq se lazim hai ye parhez karen

ki shumar aap ki aankhon ka hai bimaron mein

shaiKH-e-kaba ho diya barhaman-e-but-KHana

ek hi ke dar ye donon hain parastaron mein

dekhiye kitne KHaridar hain kya uThna hai

jins dil bhej ke un ko koi hai bazaron mein

fasl-e-gul aai KHizan bhi hue gulzar magar

tair-e-dil hai hunuz un ke giraftaron mein

sair ke waste nikla jo wo rashk-e-yusuf

band raste hue ThaT lag gae bazaron mein

ye naya yar ki sarkar mein dekha insaf

be-gunah bhi gine jate hain gunahgaron mein

kahin DhunDe se bhi milte the na arbab-e-kamal

jin dinon qadr-shanasi thi KHaridaron mein

tegh-e-qatil ke gale milte hain KHush ho ho kar

id-e-qurban hai mohabbat ke gunah-garon mein

kisi amn se na uljha na hui sohbat-e-gul

ai zaifi tan-e-zar apna hai un KHaron mein

'qalaq' isbaat-e-dahan munh ko na khulwae kahin

hai baDi baat agar baat rahi yaron mein