saKHt nazuk mizaj-e-dilbar tha

saḳht nāzuk mizāj-e-dilbar thā

ḳhair guzrī ki dil bhī patthar thā

muḳhtasar hāl-e-zindagī ye hai

laakh saudā thā aur ik sar thā

un kī ruḳhsat kā din to yaad nahīñ

ye samajhiye ki roz-e-mahshar thā

ḳhaak nibhtī mirī tire dil meñ

ek shīsha thā ek patthar thā

tum mire ghar jo aane vaale the

khole āġhosh sub.h tak dar thā

abr-e-rahmat jo ho gayā mash.hūr

kisī mai-kash kā dāman-e-tar thā

jab unheñ shauq thā sañvarne kā

ek ik aa.ina sikandar thā

āñsuoñ kī thī kyā bisāt magar

dekhte dekhte samundar thā

kaisī āzād zindagī hai 'jalīl'

dar-e-dil par jab apnā bistar thā

saKHt nazuk mizaj-e-dilbar tha

KHair guzri ki dil bhi patthar tha

muKHtasar haal-e-zindagi ye hai

lakh sauda tha aur ek sar tha

un ki ruKHsat ka din to yaad nahin

ye samajhiye ki roz-e-mahshar tha

KHak nibhti meri tere dil mein

ek shisha tha ek patthar tha

tum mere ghar jo aane wale the

khole aaghosh subh tak dar tha

abr-e-rahmat jo ho gaya mashhur

kisi mai-kash ka daman-e-tar tha

jab unhen shauq tha sanwarne ka

ek ek aaina sikandar tha

aansuon ki thi kya bisat magar

dekhte dekhte samundar tha

kaisi aazad zindagi hai 'jalil'

dar-e-dil par jab apna bistar tha