sala-e-am-e-saqi hai ki aao ba-safa kar dun

salā-e-ām-e-sāqī hai ki aao bā-safā kar duuñ

fanā kī mai pilā kar mast-o-mad.hosh-e-baqā kar duuñ

tamanna-e-visāl-e-yār hai tafrīh-e-rūhānī

jo qaabū ho to apnī jān-o-dil tum par fidā kar duuñ

mirī rangīñ-bayānī munhasir hai zikr-e-jānāñ par

mazāmīñ ma.arifat ke jis tarah chāhe adā kar duuñ

sitam hai sar jhukā kar muskurā kar yaar kā kahnā

mile ḳhūn-e-dil-e-āshiq to maiñ tark-e-hinā kar duuñ

tumhīñ ā.īna-e-vahdat meñ dekho shān-e-mahbūbī

maiñ ai 'mahvī' ye uqda raaz kā kis tarah vā kar duuñ

sala-e-am-e-saqi hai ki aao ba-safa kar dun

fana ki mai pila kar mast-o-madhosh-e-baqa kar dun

tamanna-e-visal-e-yar hai tafrih-e-ruhani

jo qabu ho to apni jaan-o-dil tum par fida kar dun

meri rangin-bayani munhasir hai zikr-e-jaanan par

mazamin marifat ke jis tarah chahe ada kar dun

sitam hai sar jhuka kar muskura kar yar ka kahna

mile KHun-e-dil-e-ashiq to main tark-e-hina kar dun

tumhin aaina-e-wahdat mein dekho shan-e-mahbubi

main ai 'mahwi' ye uqda raaz ka kis tarah wa kar dun