saliqa ishq mein mera baDe kamal ka tha

salīqa ishq meñ merā baḌe kamāl kā thā

ki iḳhtiyār bhī dil par 'ajab misāl kā thā

maiñ apne naqsh banātī thī jis meñ bachpan se

vo aa.ina to kisī aur ḳhat-o-ḳhāl kā thā

rafū maiñ kartī rahī pairahan ko aur idhar

gumāñ use mire zaḳhmoñ ke indimāl kā thā

ye aur baat ki ab chashm-posh ho jaa.e

kabhī to 'ilm use bhī hamāre haal kā thā

mohabbatoñ meñ maiñ qaa.il thī lab na khulne kī

javāb varna mire paas har savāl kā thā

daraḳht jaḌ se ukhaḌne ke mausamoñ meñ bhī

havā kā pyaar shajar se 'ajab kamāl kā thā

kitāb kis kī masāfat kī likh rahī hai havā

ye qarz us kī taraf kis ke maah o saal kā thā

saliqa ishq mein mera baDe kamal ka tha

ki iKHtiyar bhi dil par 'ajab misal ka tha

main apne naqsh banati thi jis mein bachpan se

wo aaina to kisi aur KHat-o-KHal ka tha

rafu main karti rahi pairahan ko aur idhar

guman use mere zaKHmon ke indimal ka tha

ye aur baat ki ab chashm-posh ho jae

kabhi to 'ilm use bhi hamare haal ka tha

mohabbaton mein main qail thi lab na khulne ki

jawab warna mere pas har sawal ka tha

daraKHt jaD se ukhaDne ke mausamon mein bhi

hawa ka pyar shajar se 'ajab kamal ka tha

kitab kis ki masafat ki likh rahi hai hawa

ye qarz us ki taraf kis ke mah o sal ka tha