samaya jab se hai wo gul-ezar aankhon mein

samāyā jab se hai vo gul-ezār āñkhoñ meñ

har ek gul nazar aatā hai ḳhaar āñkhoñ meñ

batāo kis kā huā jām-e-ārzū labrez

ki nashshe kā hai abhī tak ḳhumār āñkhoñ meñ

ye kis ke diid kī mushtāq hai dam-e-āḳhir

ki merī ruuh ko hai intizār āñkhoñ meñ

jo chāhte ho asā Tek kar uThe bīmār

lagāo surma-e-dumbāla-dār āñkhoñ meñ

vo rashk-e-gul jo nahīñ hai hamāre pahlū meñ

ba-rañg-e-ḳhār se fasl-e-bahār āñkhoñ meñ

tumhārī diid ke saude meñ aa gayā sau baar

taḌap taḌap ke dil-e-be-qarār āñkhoñ meñ

isī sabab se to khultī nahīñ hai aañkh mirī

phirā hī kartī hai tasvīr-e-yār āñkhoñ meñ

maiñ dekhtā nahīñ be-vajah sabza-e-nau-ḳhez

kabhī hai sabza-e-ḳhat kī bahār āñkhoñ meñ

misāl-e-mardumak-e-chashm hai ye madd-e-nazar

raheñ huzūr hī lail-o-nahār āñkhoñ meñ

duā ye rahtī hai 'vahbī' ki un ke talve kā

lagā.ūñ surme kī sūrat ġhubār āñkhoñ meñ

samaya jab se hai wo gul-ezar aankhon mein

har ek gul nazar aata hai KHar aankhon mein

batao kis ka hua jam-e-arzu labrez

ki nashshe ka hai abhi tak KHumar aankhon mein

ye kis ke did ki mushtaq hai dam-e-aKHir

ki meri ruh ko hai intizar aankhon mein

jo chahte ho asa Tek kar uThe bimar

lagao surma-e-dumbaala-dar aankhon mein

wo rashk-e-gul jo nahin hai hamare pahlu mein

ba-rang-e-KHar se fasl-e-bahaar aankhon mein

tumhaari did ke saude mein aa gaya sau bar

taDap taDap ke dil-e-be-qarar aankhon mein

isi sabab se to khulti nahin hai aankh meri

phira hi karti hai taswir-e-yar aankhon mein

main dekhta nahin be-wajah sabza-e-nau-KHez

kabhi hai sabza-e-KHat ki bahaar aankhon mein

misal-e-mardumak-e-chashm hai ye madd-e-nazar

rahen huzur hi lail-o-nahaar aankhon mein

dua ye rahti hai 'wahbi' ki un ke talwe ka

lagaun surme ki surat ghubar aankhon mein