samajh baiTha wo aaKHir na-samajh mujhko

samajh baiThā vo āḳhir nā-samajh mujh ko

maiñ jis ko ḳhuub kahtā thā samajh mujh ko

baḌā āsān thā shāyad samajhnā par

baḌī hī der meñ aayā samajh mujh ko

baḌhā kar pyaas vo merī lagā kahne

maiñ dariyā huuñ magar sahrā samajh mujh ko

jise āñkheñ kabhī samjhā nahīñ pā.īñ

bhalā us se maiñ kyoñ kahtā samajh mujh ko

na ḳhud se farz kar kuchh bhī mire baare

maiñ jaisā huuñ kabhī vaisā samajh mujh ko

maiñ tujh se bhiik kyoñ māñgūñ mohabbat kī

na itnā bhī gayā-guzrā samajh mujh ko

agar rishte meñ ho jaa.e fazīhat 'aam

to is rishte se vārasta samajh mujh ko

ba-juz rab ke yahāñ hai 'ārzī har saath

kam-az-kam aa gayā itnā samajh mujh ko

ye dil kā TūTnā bhī lāzmī thā 'zān'

kabhī aatī nahīñ varna samajh mujh ko

samajh baiTha wo aaKHir na-samajh mujh ko

main jis ko KHub kahta tha samajh mujh ko

baDa aasan tha shayad samajhna par

baDi hi der mein aaya samajh mujh ko

baDha kar pyas wo meri laga kahne

main dariya hun magar sahra samajh mujh ko

jise aankhen kabhi samjha nahin pain

bhala us se main kyon kahta samajh mujh ko

na KHud se farz kar kuchh bhi mere bare

main jaisa hun kabhi waisa samajh mujh ko

main tujh se bhik kyon mangun mohabbat ki

na itna bhi gaya-guzra samajh mujh ko

agar rishte mein ho jae fazihat 'am

to is rishte se warasta samajh mujh ko

ba-juz rab ke yahan hai 'arzi har sath

kam-az-kam aa gaya itna samajh mujh ko

ye dil ka TuTna bhi lazmi tha 'zan'

kabhi aati nahin warna samajh mujh ko