samajh mein kuchh nahin aata moamla dil ka

samajh meñ kuchh nahīñ aatā mo.āmla dil kā

huzūr aa.eñ to ho jaa.e faisla dil kā

taḌap jo baḌh ga.ī māshūqoñ ne jigar thāme

asar dikhāyā to hone lagā gila dil kā

ye un se kahtā hai hañs hañs ke un kā dīvāna

dikhā.ūñgā tumheñ ik roz hausla dil kā

karīm tū mirī maqtal meñ aabrū rakhnā

ki un ke tiir se hogā muqābla dil kā

tumhārī zulf ke kūche meñ Dar hai luTne kā

añdherī raat hai jaatā hai qāfila dil kā

kisī ke nāvak-e-mizhgāñ ne kī ḳhalish paidā

ki phuuT phuuT ke rotā hai aabla dil kā

nikālā chāragaroñ ne ajab qayāmat kī

ki un ke tiir se rahtā thā mashġhala dil kā

abhī to tā-ba-kamar hai tumhārī zulf-e-rasā

baḌhe jo aur to mil jaa.e silsila dil kā

havā ke saath zamāne meñ aa.egā tūfāñ

jo saañs lene meñ phūTegā aabla dil kā

hai un kā tiir bhī vo bhī haiñ maiñ bhī hāzir huuñ

ḳhudā ke sāmne hotā hai faisla dil kā

usī ke dar pe chalo maut bhī vahīñ aa.e

ye mujh se kahtā hai baḌh baḌh ke hausla dil kā

'shafīq' zor-e-javānī kī had nahīñ koī

kisī ke roke se ruktā hai valvala dil kā

samajh mein kuchh nahin aata moamla dil ka

huzur aaen to ho jae faisla dil ka

taDap jo baDh gai mashuqon ne jigar thame

asar dikhaya to hone laga gila dil ka

ye un se kahta hai hans hans ke un ka diwana

dikhaunga tumhein ek roz hausla dil ka

karim tu meri maqtal mein aabru rakhna

ki un ke tir se hoga muqabla dil ka

tumhaari zulf ke kuche mein Dar hai luTne ka

andheri raat hai jata hai qafila dil ka

kisi ke nawak-e-mizhgan ne ki KHalish paida

ki phuT phuT ke rota hai aabla dil ka

nikala chaaragaron ne ajab qayamat ki

ki un ke tir se rahta tha mashghala dil ka

abhi to ta-ba-kamar hai tumhaari zulf-e-rasa

baDhe jo aur to mil jae silsila dil ka

hawa ke sath zamane mein aaega tufan

jo sans lene mein phuTega aabla dil ka

hai un ka tir bhi wo bhi hain main bhi hazir hun

KHuda ke samne hota hai faisla dil ka

usi ke dar pe chalo maut bhi wahin aae

ye mujh se kahta hai baDh baDh ke hausla dil ka

'shafiq' zor-e-jawani ki had nahin koi

kisi ke roke se rukta hai walwala dil ka