samajhte hain jo kamtar har kisi ko

samajhte haiñ jo kamtar har kisī ko

vo samjheñ to sahī apnī kamī ko

jahāñ meñ juz ġham-o-ranj-o-musībat

milā bhī hai azīzo kuchh kisī ko

kaheñ bhī to kaheñ ab kyā kisī se

sunā.eñ to sunā.eñ kyā kisī ko

haqīqat meñ nahīñ bante kisī ke

banāte haiñ jo apnā har kisī ko

na pā-e-raftan ab ne jā-e-ma.adin

kahāñ tak ro.eñ apnī bebasī ko

ta.ajjub hai samajhne par bhī sab kuchh

na samjhā aadmī ne aadmī ko

ziyā-e-hazrat-e-'anvar' ne 'rif.at'

jilā baḳhshī hai merī shā.irī ko

samajhte hain jo kamtar har kisi ko

wo samjhen to sahi apni kami ko

jahan mein juz gham-o-ranj-o-musibat

mila bhi hai azizo kuchh kisi ko

kahen bhi to kahen ab kya kisi se

sunaen to sunaen kya kisi ko

haqiqat mein nahin bante kisi ke

banate hain jo apna har kisi ko

na pa-e-raftan ab ne ja-e-madin

kahan tak roen apni bebasi ko

tajjub hai samajhne par bhi sab kuchh

na samjha aadmi ne aadmi ko

ziya-e-hazrat-e-'anwar' ne 'rifat'

jila baKHshi hai meri shairi ko