sambhaale abr-e-karam tu sambhal bhi sakti hai

sambhāle abr-e-karam tū sambhal bhī saktī hai

ye dil kī shāḳh abhī phūl-phal bhī saktī hai

bujhāo maġhribī ātish kī baḌh ke chingārī

ki is se mashriqī tahzīb jal bhī saktī hai

'urūj zarf kī had se nikal na jaa.e kahīñ

ye shai farāz pe jā kar phisal bhī saktī hai

ham aaj zor mohabbat kā āzmā.eñge

sunā hai ruḳh ye havā kā badal bhī saktī hai

ye sard sard havā.eñ ye chāñdnī ye firāq

tire liye ye tabī'at machal bhī saktī hai

kisī pe marne se pahle mujhe na thā mā'lūm

ki aise jiine kī hasrat nikal bhī saktī hai

qadam qadam pe ujāloñ kā ehtimām karo

ki chalte chalte kahīñ shaam Dhal bhī saktī hai

kamāl-e-zabt ko mere mirā ḳhudā rakkhe

ye muflisī mire TukḌoñ pe pal bhī saktī hai

ḳhulūs-e-mehr-o-vafā pyaar aur mohabbat se

badal ke dekhiye duniyā badal bhī saktī hai

harī-bharī sī rutoñ meñ ye Dhal bhī saktī hai

ḳhizāñ kī zard sī rangat badal bhī saktī hai

adab kī shaan banūñ aarzū ye hai 'zaryāb'

magar ye kyā mirī hasrat nikal bhī saktī hai

sambhaale abr-e-karam tu sambhal bhi sakti hai

ye dil ki shaKH abhi phul-phal bhi sakti hai

bujhao maghribi aatish ki baDh ke chingari

ki is se mashriqi tahzib jal bhi sakti hai

'uruj zarf ki had se nikal na jae kahin

ye shai faraaz pe ja kar phisal bhi sakti hai

hum aaj zor mohabbat ka aazmaenge

suna hai ruKH ye hawa ka badal bhi sakti hai

ye sard sard hawaen ye chandni ye firaq

tere liye ye tabi'at machal bhi sakti hai

kisi pe marne se pahle mujhe na tha ma'lum

ki aise jine ki hasrat nikal bhi sakti hai

qadam qadam pe ujalon ka ehtimam karo

ki chalte chalte kahin sham Dhal bhi sakti hai

kamal-e-zabt ko mere mera KHuda rakkhe

ye muflisi mere TukDon pe pal bhi sakti hai

KHulus-e-mehr-o-wafa pyar aur mohabbat se

badal ke dekhiye duniya badal bhi sakti hai

hari-bhari si ruton mein ye Dhal bhi sakti hai

KHizan ki zard si rangat badal bhi sakti hai

adab ki shan banun aarzu ye hai 'zaryab'

magar ye kya meri hasrat nikal bhi sakti hai