sambhal kar aah bharna ai asir-e-dam-e-tanhai

sambhal kar aah bharnā ai asīr-e-dām-e-tanhā.ī

kahīñ hāthoñ se chhuT jaa.e na dāmān-e-shakebā.ī

ajab andāz rakhtī hai adā-e-dasht-paimā.ī

ki ḳhud hī ḳhaar baḌh kar chūmte haiñ pā-e-saudā.ī

jo rañg-e-husn-e-ḳhāmoshī hai vo khotī hai goyā.ī

huā jab lab-kushā ġhuncha to bāhar bū nikal aa.ī

abhī to bas tasavvur hai tumhāre āstāne kā

abhī dekhā kahāñ tum ne mirā zauq-e-jabīñ-sā.ī

kuchh is andāz se chheḌā nigāh-e-nāz-e-jānāñ ne

ki rah rah kar hamāre dil ke zaḳhmoñ ko hañsī aa.ī

rahe inkār meñ iqrār kā e.ajāz bhī pinhāñ

karo ḳhūn-e-vafā lekin ba-andāz-e-masīhā.ī

araq-āgīñ jabīñ insāniyat kī ho ga.ī 'jumbish'

ki daur aayā hai vo sharm-o-hayā kī aañkh bhar aa.ī

sambhal kar aah bharna ai asir-e-dam-e-tanhai

kahin hathon se chhuT jae na daman-e-shakebai

ajab andaz rakhti hai ada-e-dasht-paimai

ki KHud hi KHar baDh kar chumte hain pa-e-saudai

jo rang-e-husn-e-KHamoshi hai wo khoti hai goyai

hua jab lab-kusha ghuncha to bahar bu nikal aai

abhi to bas tasawwur hai tumhaare aastane ka

abhi dekha kahan tum ne mera zauq-e-jabin-sai

kuchh is andaz se chheDa nigah-e-naz-e-jaanan ne

ki rah rah kar hamare dil ke zaKHmon ko hansi aai

rahe inkar mein iqrar ka eajaz bhi pinhan

karo KHun-e-wafa lekin ba-andaz-e-masihai

araq-agin jabin insaniyat ki ho gai 'jumbish'

ki daur aaya hai wo sharm-o-haya ki aankh bhar aai