sambhal ke dekha to kanch sa jism kirchiyon mein baTa hua tha

sambhal ke dekhā to kāñch sā jism kirchiyoñ meñ baTā huā thā

ḳhabar nahīñ hai ki mere andar vo ik dhamāka sā kyā huā thā

vo kho gayā thā to yuuñ lagā thā ki izzat-e-nafs luT ga.ī hai

maiñ roz ke milne vaale logoñ meñ ik khilaunā banā huā thā

ḳhizāñ kī vo sard raat bhī maiñ ne ghar se bāhar guzār dī thī

ki mere bistar pe laash ban kar mirā hī saaya paḌā huā thā

sab apnī apnī sadā ke parcham supurd-e-shab kar ke so chuke the

bas ek maiñ hī muhīb lamhoñ ke lashkaroñ meñ ghirā huā thā

jise vo sāñsoñ kī loriyoñ se mire badan meñ sulā ga.ī thī

palaT ke aa.ī to vo chahaktā sharīr bachcha marā huā thā

ye ek parchhā.īñ sī jo sadiyoñ se mere ham-rāh chal rahī hai

yahī mirā harf-e-ibtidā hai maiñ jis se ik din judā huā thā

sambhal ke dekha to kanch sa jism kirchiyon mein baTa hua tha

KHabar nahin hai ki mere andar wo ek dhamaka sa kya hua tha

wo kho gaya tha to yun laga tha ki izzat-e-nafs luT gai hai

main roz ke milne wale logon mein ek khilauna bana hua tha

KHizan ki wo sard raat bhi main ne ghar se bahar guzar di thi

ki mere bistar pe lash ban kar mera hi saya paDa hua tha

sab apni apni sada ke parcham supurd-e-shab kar ke so chuke the

bas ek main hi muhib lamhon ke lashkaron mein ghira hua tha

jise wo sanson ki loriyon se mere badan mein sula gai thi

palaT ke aai to wo chahakta sharir bachcha mara hua tha

ye ek parchhain si jo sadiyon se mere ham-rah chal rahi hai

yahi mera harf-e-ibtida hai main jis se ek din juda hua tha