sanam hai ya KHuda kya jaane kya hai

sanam hai yā ḳhudā kyā jaane kyā hai

hamārā dilrubā kyā jaane kyā hai

na sumbul hai na kaalā hai na nāgin

tarī zulf-e-rasā kyā jaane kyā hai

kasī pahlū nahīñ ārām tujh ko

tujhe ai dil huā kyā jaane kyā hai

nahīñ ma.alūm ka.aba hai ki qibla

ḳham-e-abru tirā kyā jaane kyā hai

mirā dil loge tum yā jaan loge

tumhārā indiya kyā jaane kyā hai

jafāoñ se tirī bharnā nahīñ dil

taḌapne meñ mazā kyā jaane kyā hai

hameñ to us se hai ummīd-e-baḳhshish

magar us kī razā kyā jaane kyā hai

nazar pherī nahīñ tū ne to ham se

ye phir ishva-numā kyā jaane kyā hai

tasavvur meñ jo kī haiñ band āñkheñ

dikhā.ī de rahā kyā jaane kyā hai

bhalā tū āshnā hogā kasī kā

are nā-āshnā kyā jaane kyā hai

qayāmat hai qad-e-bālā tumhārā

nigāh-e-fitna-rā kyā jaane kyā hai

nikaltā hai dhuāñ jo aah ke saath

ye ai dil jal rahā kyā jaane kyā hai

bhalā maiñ kyā use batlā.ūñ 'anjum'

vo mujh se pūchhtā kyā jaane kyā hai

sanam hai ya KHuda kya jaane kya hai

hamara dilruba kya jaane kya hai

na sumbul hai na kala hai na nagin

tari zulf-e-rasa kya jaane kya hai

kasi pahlu nahin aaram tujh ko

tujhe ai dil hua kya jaane kya hai

nahin malum kaba hai ki qibla

KHam-e-abru tera kya jaane kya hai

mera dil loge tum ya jaan loge

tumhaara indiya kya jaane kya hai

jafaon se teri bharna nahin dil

taDapne mein maza kya jaane kya hai

hamein to us se hai ummid-e-baKHshish

magar us ki raza kya jaane kya hai

nazar pheri nahin tu ne to hum se

ye phir ishwa-numa kya jaane kya hai

tasawwur mein jo ki hain band aankhen

dikhai de raha kya jaane kya hai

bhala tu aashna hoga kasi ka

are na-ashna kya jaane kya hai

qayamat hai qad-e-baala tumhaara

nigah-e-fitna-ra kya jaane kya hai

nikalta hai dhuan jo aah ke sath

ye ai dil jal raha kya jaane kya hai

bhala main kya use batlaun 'anjum'

wo mujh se puchhta kya jaane kya hai