sanam teri gali mein mai-kada ho kya maza ho

sanam terī galī meñ mai-kada ho kyā maza ho

visāl-e-yār mumkin ho na ho kuchh to nasha ho

maiñ apnā chāñd āñkhoñ meñ basā.e muntazir huuñ

mujhe bhī chāñd koī aaj chhup kar dekhtā ho

'ibādat kī tarah us ne mujhe chāhā hai lekin

mohabbat karne vaalā bhī zarā sā bevafā ho

mire naġhme zamāne bhar meñ gaa.e jā rahe haiñ

tumhīñ vo she'r ho jo zindagī meñ rah gayā ho

palak jhapke na mujh ko niiñd aa.e sochtā huuñ

tirī tasvīr ho bas 'umr-bhar kā ratjagā ho

usī ko DhūñDhtā huuñ maiñ yahī ik aas le kar

mire baare meñ koī mujh se behtar sochtā ho

zamāne bhar ke rishtoñ ko nazar-andāz kar deñ

hamāre darmiyāñ ulfat kā aisā silsila ho

musalsal qurbateñ ham ko na yuuñ bezār kar deñ

zarā socho ke ham tum meñ kabhī to fāsla ho

sabhī ne iḳhtilāf-e-rā.e ke ḳhanjar se maarā

'rafīq'-e-man batā terā jo koī ham-navā ho

sanam teri gali mein mai-kada ho kya maza ho

visal-e-yar mumkin ho na ho kuchh to nasha ho

main apna chand aankhon mein basae muntazir hun

mujhe bhi chand koi aaj chhup kar dekhta ho

'ibaadat ki tarah us ne mujhe chaha hai lekin

mohabbat karne wala bhi zara sa bewafa ho

mere naghme zamane bhar mein gae ja rahe hain

tumhin wo she'r ho jo zindagi mein rah gaya ho

palak jhapke na mujh ko nind aae sochta hun

teri taswir ho bas 'umr-bhar ka ratjaga ho

usi ko DhunDhta hun main yahi ek aas le kar

mere bare mein koi mujh se behtar sochta ho

zamane bhar ke rishton ko nazar-andaz kar den

hamare darmiyan ulfat ka aisa silsila ho

musalsal qurbaten hum ko na yun bezar kar den

zara socho ke hum tum mein kabhi to fasla ho

sabhi ne iKHtilaf-e-rae ke KHanjar se mara

'rafiq'-e-man bata tera jo koi ham-nawa ho