sanbhal nahin gai hazrat durust ho gai hai

sañbhal nahīñ ga.ī hazrat durust ho ga.ī hai

bigaḌ ke aur bhī hālat durust ho ga.ī hai

'ajīb baat sunī hai ḳhudā mu'āf kare

ki āñ-janāb kī sohbat durust ho ga.ī hai

ḳharāb shai huā kartī thī koī din pahle

tujhe milī hai to shohrat durust ho ga.ī hai

na-jāne kaun muḳhātib hai in dinoñ mujh se

koī bhī ho mirī luknat durust ho ga.ī hai

ġhalat to ḳhair mohabbat meñ aur kyā hotā

magar ye hai ki tabī'at durust ho ga.ī hai

abhī gayā hai mujhe koste hue koī

ki us ta.iiñ mirī niyyat durust ho ga.ī hai

khulā ki us se bichhaḌne kī der thī 'javvād'

mirī ik aur bhī 'ādat durust ho ga.ī hai

sanbhal nahin gai hazrat durust ho gai hai

bigaD ke aur bhi haalat durust ho gai hai

'ajib baat suni hai KHuda mu'af kare

ki aan-janab ki sohbat durust ho gai hai

KHarab shai hua karti thi koi din pahle

tujhe mili hai to shohrat durust ho gai hai

na-jaane kaun muKHatib hai in dinon mujh se

koi bhi ho meri luknat durust ho gai hai

ghalat to KHair mohabbat mein aur kya hota

magar ye hai ki tabi'at durust ho gai hai

abhi gaya hai mujhe koste hue koi

ki us tain meri niyyat durust ho gai hai

khula ki us se bichhaDne ki der thi 'jawwad'

meri ek aur bhi 'adat durust ho gai hai